Тываның каттышкан бюджединиң бирги чартык чылда күүселдезиниң баш бурунгаар түңнелдери

 Бирги чартык чылда республиканың каттышкан бюджединче үндүрүг болгаш үндүрүгден өске орулгалардан план езугаар 2 935 млн. рубль кирер тургаш, 3029 млн. рубль түңнүг акша кирип, бирги чартык чылдың планы 103 хуу, чыл планын 50 хуу күүсеткенин, Тываның Саң-хөө яамызы дыңнаткан.

 «Межегейхөмүр» БК дээн ышкаш, улуг үндүрүг төлекчилеринден доктаамал кирип турар аванс төлевиринден организацияларның орулгазынга үндүрүг акшазы кылдыр 240 млн. рубль кирген, хуу кижилерниң орулгазындан - 43 млн. рубль база организацияларның эт-хөреңгизинге - 67 млн. рубль үндүрүг чыгдынган. Орулгаларның кол кезиин ХКҮО (51%) ээлээн, ындыг болзажок орулга үндүрүүн 7 хууга улгаттырганындан, ол 3 хууга кызырылган.  

 Каттышкан бюджеттиң кол кезээ – республика бюджединиң бодунуң орулгазындан киирилделери 74 хуу ажыгга чыгдынган, азы 2243 млн. рубль, чартык чылдың планын 103 хуу күүсеткен (план - 2174 млн. рубль), пландан өрү 70 млн. рубль кирген. Эрткен чылдың бо үезинге деңнээрге, республика бюджеди 13 хууга, азы 250 млн. рубль өзүлделиг болган. 

 Каттышкан бюджет орулгазының 26 хуузун тус чер бюджеди ээлээн, ол 785 млн. рубльга дең, планны 103 хуу күүсеткен (+24 млн. рубль), шупту муниципалитеттер планын күүсеткенин демдеглээн.