Тываның Баштыңы социал объектилер тудуунуң талазы-биле оперативтиг хуралды эрттирген

 Тываның Баштыңы Шолбан Кара-оол понедельникте, аппарат хуралының соонда, республика девискээринде социал объектилер тудуунуң талазы-биле оперативтиг хуралды чыгган. Чазак Даргазының оралакчылары Александр Брокерт, Шолбан Хопуя база Владимир Фалалеев, сайыттар Орлан Донгак база Юрий Килижеков, ол ышкаш тудуг организацияларының төлээлери аңаа киришкен.  

 Олар Кызыл хоорайда терапия корпузу биле Спутник микрорайонунда чаа школа тудуу кайы хире чоруп турарын, Ийи-Тал суурда спорт залдыг болгаш интернаттыг чаа школа тудуунда тургустунган чидиг айтырыгларны сайгарган. Регионнуң удуртукчузу тудуг ажылдарының акшаландырыышкынын үе шаанда хандырарын коллегаларынга дааскаш, календарлыг графикти боду хыналдага алырын дыңнаткан.

 Кызылда объектилерде ажылдарны август ортанга чедир адакталдырын регион Баштыңы негээн. Көдээ школа тудуунче онза кичээгейни салырын база сагындырган.