Тывада уругларның айыыл чок чоруунуң айын чарлаан

 Республиканың Чазаа июль 1-ден Тывада уругларның айыыл чок чоруунуң айын чарлаан. Тываның Баштыңы Шолбан Кара-оол ону организастап эрттирериниң ажылдарын социал адырны харыылап турар бодунуң оралакчызы Шолбан Хопуяга дааскан. 

 Уругларның айыыл чок чоруун магадылаарынче назы четпээннер херектериниң талазы-биле комиссиялардан эгелээш ОБЯ-ның кезектеринге чедир, регион болгаш муниципалдыг деңнелдиг шупту структураларны хаара тудар. ТР-ниң Чазааның бадылааны айның планында, акцияларынга киржир ведомстволар болгаш албаннар база хөй-ниитиниң онза кичээнгейинге турар ужурлуг уругларга болгаш элээдилерге айыылдыг зоналар картазын тургускан. Ындыг зоналарга чурттакчылыг черлерде хемнер-суглар болгаш арга-арыглар, оруктар, тудуг шөлдери, ажык коммуникация, канализация болгаш кудуктар хамааржыр. 

 Чайгы кадыкшылга лагерьлеринде хаара туттунмаан уругларлыг чединмес өг-бүлелерни илередир рейдилер дээн ышкаш хемчеглерни шалыпчы айның дургузунда планнаан. Социал болгаш патронаж албаннары ындыг өг-бүлелер-биле кады ажылдаар. Өрт айыылының, орук чурумнарының, берттип-кемдээшкин дугайында тайылбыр ажылдарын чорудар. Чогуур хайгаарал органнары онза байдалдарны болдурбазы-биле уругларның кадыкшылга, социал болгаш эмнелге албан черлерин онза хыналдага алыр.