Тывада үлетпүр бүдүрүлгезиниң индекизи ниити-российжини ашкан

 Тывада үлетпүр бүдүрүлгези январь-апрельде шапкынчып, ортумак российжи көргүзүгнү ашкан. Красноярскиниң статистика көргүзүү-биле алырга, 2017 чылдың баштайгы дөрт айында республикада үлетпүр бүдүрүлгезиниң индекизи 2016 чылдың ол үезинге деңнээрге 128 хуу болган. Россияда үлетпүр бүдүрүлгезиниң хемчээли ортумаа-биле оон элээн оожум – 100,7 хуу.  

 Тываның Экономика яамызы, эрткен чылдың ол үезинге деңнээрге, колдуунда ажыктыг казымал тывыжын улгаттырганындан, 144 хуу өзүлде болганын дыңнаткан. Регионнуң бүдүрүлгезинде улуг үлүгнү: хөмүр-даш адыры – 155,5 хуу база демир рудазының тывыжы – 140,7 хуу киирген. Росстаттың медээзи-биле алырга, чуртта тывыш үлетпүрүнүң өзүлдезиниң хемчээли чүгле 1,9 хуу болган. 

 Тываның болбаазырадылга адырларында база көдүрлүүшкүн демдеглеттинген. 2016 чылдың январь-апрельге деңнээрге, бо чылдың ол үезиниң индекизи 127,2 хуу (Россияда – 99,6 хуу). Республиканың Экономика яамызының эксперттери суг продукциязының хемчээлин 20,5 хуу улгаттырганындан, суксун бүдүрүлгезинде эки динамика демдеглеттингенин айыткан. Ооң соондан резина болгаш тудугга херек чуктан кылыглар бүдүрүлгези – 188,6 хуу, текстиль кылыглары - 163 хуу, аъш-чем продуктулары – 115,6 хуу, ыяштан кылыглар – 101,7 хуу чоруп олурар. 

 Электри болгаш чылыг энергетиказында, база суг хандырылгазының бүдүрүлгезинде хемчээлдер бичии-ле өссе-даа, эрткен чылдың деңнелинде арткан. Ындыг болзажок, Тыва ол ажыл-чорудулганың хевирлери-биле ортумак российжи күргүзүглерни ашкан, ылаңгыя суг каналының ачы-дузазы Россияда 96,7 хуу болза, Тывада – 101,7 хуу.