Россияның Президентизи Владимир Путин Тываның Баштыңы Шолбан Кара-оолга Найырал ордени – бедик күрүне шаңналын тывыскан

 Май 24-те Кремльге Россия Федерациязының күрүне шаңналдарын тыпсыр езулал эрткен. Эртем, үлетпүр, культура, кадык камгалал болгаш спорт адырында үжен хире шылгараңгай российжилерге орденнер болгаш хүндүлүг аттарны тывыскан. 

 Владимир Путин оон аңгыда, Сирияда террористер-биле демиселге: Алеппо можуда фронт участогунга ийи хүн иштинде хөй санныг дээрбечилерниң шавар халдаашкынынга удур тулушкан Россияның Чепсектиг Күштериниң тускай операциялар күштериниң бөлүүнден элээн каш офицерлерге күрүне шаңналдарын тывыскан. Президент тускай шериг кезээниң дайынчыларын боду шаңнаарын ооң мурнунда аазаан турган. 

 Тыва Республиканың Баштыңы Шолбан Кара-оолга база элээн каш регионнарның губернаторларынга бедик күрүне шаңналдарын тывыскан. Россияның Президентизи Владимир Путин «күш-ажылчы чедиишкиннери, идепкейлиг хөй-ниити ажыл-чорудулгазы дээш» Найырал ордени-биле регионнуң удуртукчузун шаңнаан. 2017 чылдың январьда ол дугайында чарлыкка атты салган. 

 «Россияның баштыңы, бистиң Президентивис Владимир Владимирович Путинниң холундан бедик шаңналды сүрээдел болгаш чоргаарал-биле алдым. Найырал ордени – чүгле мээң ачы-хавыяам эвес-тир. Тыва чаңгыс черде турбайн, чылдан чылче улуг, бичии тиилелгелерни чедип ап турары дээш, мээң шупту чаңгыс чер-чурттугларым ажылының түңнелдеринге үнелел болур. Ооң эң колу – бистиң чаңгыс демниивис, эп-найыралдыывыста. Олар чок болза, бурунгаар хөгжүүрү болдунмас. Силерге мөгейип, четтиргеним илереттим, чаңгыс чер-чурттуглар» - деп, Тываның Баштыңы Шолбан Кара-оол байырлыг езулал соонда бодунуң блогунда бижээн. 

 2015 чылда, Тываның Баштыңы Шолбан Кара-оол Президентизиниң чарлыы-биле, чоннар болгаш шажыннар аразында тайбыңны болгаш ниитилелге эп-найыралды быжыглаарынга улуг үлүг-хуузу дээш «Ада-чурт мурнунга ачы-хавыяазы» орденниң II чергезиниң медалы-биле шаңнатканын сагындыраал.