«Бүзүрелдиг шиитпирлер садыының» беш төлевилелин Тывага ажыглаар

 Стратегтиг инициативалар агентилелиниң саналдааны «Бүзүрелдиг шиитпирлер садыы» программа-биле регионнарның тулган дээн арга-дуржулга даңзызындан беш төлевилелди Тываның эрге-чагыргазы күүседир дээш шилип алган. 

 Бөгүн республиканың чазаа агентилел-биле ол төлевилелдерни боттандырарынче угланган чогуур дугуржулганы кылган. РФ-тиң өске субъектилериниң девискээрлеринде хоорай хүрээлелин хөгжүдеринге бодунуң дээштиин шынзыткан төлевилелдерни шилип алганын, Тываның экономика сайыды Тувы Елена Каратаева дыңнаткан. 

 ТР-ниң Бойдус курлавырлары болгаш экология яамызы Тываның найысылалында коммунал кадыг боктарны болбаазырадыр амгы үениң системазын тургузарын планнаан. Амгы үениң хоорайынга чаңгыс аай комплекстиг тудугну кылырын сүмелээн «Иркутскиниң кварталдары» төлевилелдиң эгелээшкинин ажыглаар аргаларны регионнуң Тудуг яамызы көрүп турар.  ТР-ниң Күш-ажыл болгаш социал хөгжүлде яамызы инвалидтерге шаптараазыннар чок хүрээлелдерни тургузар «Чедингир хүрээлел» күрүне программазын республикага боттандырарының тааржыр арга-хевирлерин дилеп турар.

 ТР-ниң Одалга болгаш энергетика яамызы биле Кызылдың мэриязы ийи төлевилелди кады ажыглалче киирер. Хуу бизнес структураларының удуртулгазынче котельнаяларны болгаш чылыг четкилерин дамчыдып берген Тула облазының Ясногорск хоорайның арга-дуржулгазын ажыглап, найысылалдың чылыг хандырылга системазын модернизастаарының бир төлевилели бар. «Ростелекомнуң» Смоленск облазының Сычев хоорайда кудумчулар чырыдылгазынга чырык камнаар технологияларны ажыглаан арга-дуржулгазы хоорайның чырык хандырылгазынче бюджеттен чарыгдалды 70 хуу кызырган эки арга-дуржулгалыг.

 «Бүзүрелдиг шиитпирлер садыы» - хамаатыларга күрүне ачы-дузаларын бээр эки арга-дуржулгалыг херектерни чыгган стратегтиг инициативалар агентилелиниң онлайн-шөлчүгежи дээрзин сагындыраал. Ооң онзагай талазы, айтырыгларны шиитпирлээринге күрүне-хуу кады ажылдажылгага даянып, хуу инвестицияларны идепкейлиг хаара тудары болур.