Тываның Баштыңы Кремль рейтингиде бодунуң туружун экижиткен

 Бо чоокку алды ай иштинде халажып болур губернаторларны айтып, 1-ден 5 саннар-биле үнелээн. Журналистер, хөй-ниити ажылдакчылары, политологтар, эрге-чагырга органнарының төлээлери, социологтар кирген регион политиказының адырында 100 ажыг башкарыкчы эксперттерниң айтырыгларынга даянгаш, ону тургускан. Оон аңгыда, тускай албаннарның дамчытканы тайбың байдалдың деңнелин, экономиктиг параметрлерниң, чажыт медээлерниң көргүзүглерин база алган. 

 2017 чылдың апрель 10-нуң байдалы-биле алырга, соңгулдада Шолбан Кара-оолга бүзүрелдиң деңнели – быжыг дөрт. Медээ берикчилери Кремльдиң мурнунга губернаторнуң туружунуң быжыын, бо чоокку үеде ону халаары болдунмазын айтып турар. Кремль администрациязында регионнарның кураторлары Президент соңгулдаларының мурнунда солушкан, регионнар баштыңнарының политиктиг депшилгези тодараттынып турар. Ук рейтингиде Тываның Баштыңы 2011 чылдан бээр «экилерниң» санында кирип турарын айтыр апаар.  

 Ямал-Ненец база Чукот округтар, Тула база Иркутск областар, Забайкалье край, Чечен болгаш Марий Эл республикалар - рейтингиниң «тергииннери». А «айыылдыг зонада» 10 ажыг губернатор бар, оларның 8-и бо чоокку айларда албан-дужаалдарын хүлээдир чадавас деп, эксперттер санап турар. Кремльдиң онаалдаларын регионнар баштыңнарының күүседип шыдаары, азы эрге-дужаалын хүлээдиринге кол чылдагаан - президент соңгулдалары болур.