Шолбан Кара-оол: «Эрес-дидим чоруктуң девискээри» төлевилелди боттандырарда, патриотчу кижизидилгениң инфраструктура хөгжүлдезин тургузар

 Тываның Чазаа «Тыва – эрес-дидим чоруктуң девискээри» шериг-патриотчу төлевилелдиң хемчеглер планын сайгарып көрген.  

 Республика Баштыңы Шолбан Кара-оол хөй националдыг патриотчу кижизидилгениң хөй талалыг бүгү системазын чаңгыс комплекстиг төлевилелче каттыштырарын саналдаан болгаш, ону 2017 чылда Дээди Хуралга Айыткалында демдеглээн. 

 «Бис, Россияның Маадыры, камгалал сайыды Сергей Кужугетович Шойгунуң чаңгыс чер-чурттуглары патриоттуг ажылдың лидерлери болур ужурлуг бис! Кадеттерни, аныяк армейжилерни, шериг-патриоттуг, спортчу, культурлуг организацияларны чаңгыс улуг шимчээшкин кылдыр каттыштырар ужурлуг бис. Ынаар хөй-ле бөдүүн ажы-төлдү, чүнү-даа мурнай, кудумчудан уругларны хаара тудар. Уруглар уругларга, аныяктар аныяктарга үлегер боор ужурлуг" – деп, Тываның Баштыңы Шолбан Кара-оол Айыткалда айыткан.

 Тываның информатизация болгаш харылзаа сайыды Рустам Грицюк Чазак кежигүннеринге ажылчын бөлүктерниң составын болгаш хемчеглерниң ниити организастыг планын таныштырган. РФ-тиң Президентизиниң Сибирь федералдыг округда бүрүн эргелиг төлээзи Сергей Меняло республикада патриотчу кижизидилгени сайзырадыр талазы-биле эки талаже өскерилге барын дыңнаткан. Тываның Баштыңының чарлааны «Тыва – эрес-дидим чоруктуң девискээри» төлевилел Россияның национал идеязын илереткен патриотчу чоруу-биле эң чүүлдеш. РФ-тиң Президентизи Владимир Путин ындыг кол угланыышкыннарны айыткан. 

 Хемчеглер планын үш бөлүкке чарган: «Эрес-дидим чоруктуң школазы», «Эрес-дидим чоруктуң девискээри», «Эрес-дидим чоруктуң кичээлдери».  

 «Эрес-дидим чоруктуң школазынга» тренировкаларны болгаш шериг-спортчу лагерьлерни организастаары планнаттынган. Ооң бирээзи Республиканың уругларга немелде өөредилге төвүнүң баазазында тургустунган. Ол-ла угланыышкында «Эрес-дидим чоруктуң взводтарын» тургузуп, ынаар ортумак профессионал өөредилге черлериниң сургуулдарын хаара тудар. Муниципалдыг деңнелге шилиттинген кадеттер, юнармейжилер, үстүкү классчылар, студентилер командаларының киржилгези-биле эрес-дидим чоруктуң следу - бо чылдың бир өзек болуушкуну болур.  

 Тываның Баштыңы Шолбан Кара-оол эрге-чагыргаларның кол айтырыы – патриотчу кижизидилгени сайзырадыр инфраструктураны хевирлээри болурун айтып, төлевилелди боттандырар талазы-биле ажыл-чорудулга планын чедир кылыр даалганы берген. 

 "Тыва - эрес-дидим чоруктуң девискээри " ылгавыр демдек талазы-биле айтырыгны көдүрүп тура, бирги ээлчегде, эрге-чагырга патриотчу кижизидилгени сайзырадыр инфраструктураны тургузарын айтып тур мен. Кижизидилге чорудуунга чугула үндезиннер херек. Ол дээрге, патриотчу чорук, төрээн черинге ынакшыл, өгбелери, ужур-чаңчылдары болгаш езулалдары-биле харылзаа деп бодаар мен. Ажыл-чорудулганың ниити системазын тургузар. Инфраструктураны хевирлээрде чүгле чамдык структуралар эвес, а Чазактың шупту кежигүннери ажылдаар ужурлуг. Найысылалда хөй квартиралыг бажыңнар адаанда черлерни спортчу, шериг-патриотчу клубтарга бээр кылдыр кичээнгейни база катап угландырдым. Ону шыдаар бис, коллегалар! Кижи бүрүзү киришсин. Боттуг хөделишкиннер планын чедир ажылдап кылыңар» - деп, Тываның Баштыңы даалганы берген.