Тываның Баштыңы - эң нептереңгей 5 блогер-губернаторларның бирээзи

 Россияның губернаторларындан Интернет ажыглакчылар аразында эң-не нептереңгейиниң талазы-биле, Тываның Баштыңы Шолбан Кара-оолдуң «Контактыда» арыны 5-ки черни ээлээн.  

 Четкиде губернаторларның блогтарын анализтээн «Интернет-агитация» агентилелдиң эксперттери ындыг түңнелди үндүрген. Республика Баштыңының соцчеткилерде бижимелдерин-не 10 муң ажыг кижи номчуп турар.  

 Чечен Республиканың Баштыңы Рамзан Кадыровтуң бижимелдерин ортумаа-биле 73 муң кижи номчуп турары-биле, эң-не нептереңгей блогер болган. Ооң соонда Рустам Минниханов (Татарстан), Сергей Собянин (Москва), Андрей Воробьев (Подмосковье) база Шолбан Кара-оол (Тыва) чоруп олурар. 

 Хөй-ниити үзел-бодалын шинчилээр бүгү-российжи төптүң медээлери-биле езугаар, российжилерниң 52 хуузу эң-не билдингир четки – «Контактыны» ажыглап турарын шинчилелдиң авторлары тайылбырлаан. Оон аңгыда, «Контактыда» шупту бижимелдерни көргенин санаар арганы мартта киирген болгаш, хуу арыннарже ылап киргенинге үнелелди берип эгелээн. Шын статистиканы чорудары-биле, айда оода бир катап чаартынып турар хуу бижимелдерни алган. Ол дээрге, рейтингиже кирер дизе, губернатор 2017 чылдың эгезинден бээр үш хире бижимелди салыры-дыр. 85 губернаторнуң чүгле 18-и «Контактыда» ынчаар бижип турар болза, беш регионнуң баштыңнары хуу арыннарын долдурбастаан, а артканнарында ол шуут чок деп, «Известияның» эксперттери түңнээн.  

 SNMG компанияның партнерунуң башкарыкчызы Денис Терехов рейтингиниң түңнелдерин тайылбырлап тура, регион аудиториязында тускай угланыышкынныг ажылды идепкейлиг чорудуп турарындан лидерлерниң баштайгы үжү ындыг болур ужурлуг деп айыткан. Бешки черже Тываның Баштыңының киргени оштавааны чүүл болган.  

 — Москвадан көөрге, езулуг лидерлерден өске кым-даа идепкейлиг аккуантылар чорутпайн турар ышкаш, чок ындыг эвес. Федералдыг айтырыглардан аңгыда, тус черге хамааржыр чүүлдерни доктаамал хөйү-биле бижип турар регион баштыңнарының хуу арыннары чонга солун болуп турар чадавас деп — деп, Денис Терехов демдеглээн.