Тываның Баштыңы Кыдат тываларынга национал хепти белекке сөңнээн

 Тываның Баштыңы Шолбан Кара-оол республикага хөөмейлеп өөренип алыр дээш чыл эгезинде келген этниктиг тывалар-биле ужурашкан.  

 Олар ийи ай дургузунда Тыва культура төвүнге хөөмейни шиңгээткен. Бады-Өлзей, Мөңге-Далай биле Шонду аңаа өөренип алганы тыва кожамыктар биле хөөмейин регионнуң удуртукчузунга сонуургаткан. Тыва культураны кадагалап арттырар база ону нептередир дээн оларның чүткүл-соруу макталга төлептиг болган. Шолбан Кара-оол езулуг тыва кижиниң овур-хевирин долу көргүзери-биле аалчыларга тыва хепти белекке берген. Оолдар ол-ла дораан тыва тоннарын кеткеш, тураскаалга тырттырып алганнар.

 «Маңаа келгенивиске дыка өөрүп тур бис, дыка хөй чүвеге өөренип алдывывыс. Ам төрээн чуртувусче аъттаптар бис, ында база хөөмейлеп өөренип алыр дээш манап турар эштеривис бар. Ол бистиң төөгүвүс, бистиң дазылывыс-тыр, ону чидирип болбас. Тывага өөренири дыка солун болду» - деп, 23 харлыг Шонду чугаалаан. 18 харлыг Бады-Өлзей Тывага профессионал мергежил чедип алыр сорулгалыг. Республика Баштыңы Шолбан Кара-оол эге дээрезинде Кызылдың башкы колледжизинге өөренирин сүмелээн. Эки өөренир болза, Тываның күрүне университединче шилчидип алыр арга база барын чугаалаан. 

«Кыдатта тывалар – бистиң оолдар-биле бөгүн база катап ужураштым. Төөгүлүг төрээн черинге ийи ай дургузунда тургаш, тыва культураны оон-даа ханы шиңгээдип, төрээн дылын эки билир апарып-тырлар. Чүнүң дугайында ырлап турганын ам-на эки угаап тур бис деп, минниндилер. Чүге өөренип алганын дораан көргүзүп, езулуг тыва кижи дег хөөмейледилер. Эр-хейлер! Тыва деп адынга төлептиг болзун дээш, национал хепти белекке бердим. Ам аал-чуртунче аъттаптарлар, ында хөөмей-сыгытка өөренип алыр дээн эш-өөрү манап турар. Тывага ам-даа улаштыр өөренип, билиг-мергежилин боттарының чаңгыс чер-чурттугларынга дамчыдар дээн оолдарның изиг күзелин дыңнааш, өөрдүм. Тыва культураны болгаш тыва дылды кадагалап арттырары болгаш сайзырадыры-биле холбашкан кандыг-даа эгелээшкиннерни деткииринге белен мен!» - деп, Тываның Баштыңы Шолбан Кара-оол ужуражылга соонда бодунуң блогунда бижээн.

 Кыдаттың Синьцзян-Уйгур автономнуг можуда этниктиг тывалар чурттап турар. Оларның ниити саны - 2,5 муң хире кижи.