Тываның Баштыңы: чазактың социал адырын күштелдирер херек

 Регион Баштыңы хуралда хүлээп алганы кадрлар шиитпирин чарлап, мурнады боттандырыр ажыл-чорудулганы ылавылаан. Шолбан Кара-оол социал адыр хөгжүлдези чаа сорулгаларны манап турарын айыткан. ТР-ниң Чазааның Даргазының социал угланыышкынны харыылаар оралакчызы болур Шолбан Хопуяга ындыг онаалда онаашкан.

  "Чаа куратор адырда эки ажыл-херектерни арттырып алырынга бүзүрээр мен. Ындыг болзажок бөгүнгү байдал чогумчалыг эвес. Чаа тура-чүткүл херек. Саң-хөөге болгаш күштерге даянгаш, хөгжүүрүнүң чаа аргаларын тывар. Кадрлар курлавырын көвүдедип, кадагалап арттырар. Кадрлар политиказын ажылдың түңнелдерин, шынарын чедип алырынче угландырар. Аныяк, перспективтиг ажылдакчыларга «социал чаданы» хандырарын удуртукчулардан диледим. База ол ышкаш чон ортузунче кирер херек. Хүлээп алыышкыннар хүннерин база шактарын бүгүдеге билдингир болдурар болгаш ону хажытпас ужурлуг. Амыр эвес бо үеде акша-төгериктиң шаа-биле, ындыг болзажок амгы ниитилелдиң негелдези-биле чурттаарын сагындырайн» - деп, Тываның Баштыңы чугаалаан. 

 Күш-ажыл болгаш социал политика сайыды Людмила Тас-оол, өөредилге болгаш эртем сайыды Татьяна Санчаа, культура сайыды Алдар Тамдын, спорт болгаш аныяктар политиказының сайыды Адам Текеев, кадык камгалал сайыдының бирги оралакчызы Белекмаа Монгуш, Националдар херектериниң талазы-биле агентилелдиң удуртукчузу Вера Лапшакова боттарының удуртканы адырларда байдалдың болгаш кедизиниң дугайында таныштырганнар. 

 Тываның күрүне университединиң ректору Ольга Хомушку, билигниң шынарын бедидип база доозукчуларын ажылга тургустунарын чедип алыры – өөредилге чериниң кол айтырыы ол деп чугаалаан. Өөредилгезин дооскаш, аныяк специалистер даштыкыга стажировканы эрттирип, төрээн черинге чанып келгеш, ажылдап турар эки үлегер-чижектер барын ол дыңнаткан. В. Халилов аттыг Тываның күрүне филармониязының директору Игорь Дулуш, "Хөөмей" эртем төвүнүң удуртукчузу Зоя Кыргыс уран чүүл сайзыралында айтырыгларны көдүрген. 

 Республиканың Национал музейиниң директору Каадыр-оол Бичелдей Тываның Баштыңының кадрлар политиказынче улуг кичээгейни салганын деткип, кадрларны белеткээр болгаш оларны хуваарының стратегиязы – системниг документ херек деп бодунуң көрүжүн илереткен. 

 Тывага инвалид уруглар-биле ажылдаар адаптациялыг спортчу школаны тургузар дээн ышкаш кадык камгалалынга болгаш спортка хамааржыр айтырыглар база көдүрүлген.

 "Серебрянка" санаторийниң кол эмчизи Алисса Шимит республикада санаторлуг-курорт эмнээшкининиң калбарганы-биле орун фондузун көвүдедир саналды киирген. «Туран» сыын ажыл-агыйының фондузун база Дус-Хөлде дыштанылга баазазын ол төлевилелче хаара тудуп болур. Тываның Чазааның Даргазының оралакчызы база тускай углааныышкынныг яамылар киирген санал-оналдарны улаштыр сайгарып көөр. 

 "Меңээ бүзүрээни дээш Тываның Баштыңы Шолбан Валерьевич Кара-оолга четтирдим. Адырлар аайы-биле аналитика бар. Баш бурунгаар санаашкыннар-биле алырга, социал адырда 40 муң хире кижи хаара туттунган. Сорулгалар билдингир, ону күүседир дээш кады ажылдаар бис. Мындыг калбак хевирге коллегалар-биле ужурашканым дээш өөрүп четтиргенимни илередийн. Ол дыка улуг деткиишкин-дир» - деп, Шолбан Хопуя чугаалаан.