Тываның Баштыңы Сибирьниң бирги чери дээш бокс маргылдаазынга тиилээн Ай-Демир Уржанайга байырны чедирген

 Сибирь федералдыг округтуң бирги чери дээш 17-18 харлыг элээдилер ортузунга бокс маргылдаазы Кызыл хоорайга эрткен. Аңаа ниитизи-биле 49-тан 91 кл деңзилерге 10 комплект шаңналдарны ойнаан.  

 Тываның Баштыңы Шолбан Кара-оол төнчү оюннарын сонуургап көрген. Турнирниң тиилекчилерин шаңнаан езулалга база киришкен. Чартык түңнел оюннарның түңнели-биле Тывадан үш спортчу чемпион ат дээш тулушкан.  

 49 кил чедир деңзиге Айдың Сарыглар Иркутск облазында Рамиль Сулеймановату тиилээн. 56 килге Ай-Демир Уржанай Томск облазындан Юрий Медведевти 3:0 сан-биле ойнап алган. База ол ышкаш Владимир Чооду 60 кил чедир оюннарга Омск облазындан Сергей Алыевти ашкан.  

 Төнчү тулчуушкуннар 3 минутага, 3 раундулуг эрткен. Новосибирск облазындан Геннадий Малинкинни тиилээш, 56 килге Ай-Демир Уржанай чемпионнаан. А Айдын Сарыглар биле Владимир Чооду ийиги черлерни ээлээннер. 

 Ай-Демир Уржанай – 11-ги классчы, Тес-Хемниң элээди уругларының спорт школазының сургуулу. Спортчуну 10 харлыындан тренер Самет Чимбиян белеткээн.  

 Россияның СФО-нуң бирги чери дээш элээдилер ортузунга бокс маргылдаазынга тиилээн спортчулар май эгезинде Оренбургче Россия чемпионадынче аъттаныптар. Тывага эрткен маргылдаага 200 ажыг спортчу киришкен. Аңаа Сибирьниң шупту 12 регионундан командалар киришкен. Тываны 11 спортчу төлээлээн, оларның 8-зи Тес-Хемниң элээди уругларының спорт школазының, 3-ү "ЦСКА-Тыва" сургуулдары.