Тываның Баштыңы республиканың тудуг яамызының удуртулгазы-биле ужурашкан

«Күртудуг-чагыг» күрүнениң казна албан чери биле «Капитал тудуг эргелели» күрүнениң бюджет албан черин чаңгыс организация кылдыр каттыштырган. Ооң кол сорулгазы — бюджет акша-хөреңгизин камнаары-биле чергелештир ол албан черлериниң сорулгаларының, хүлээлгелериниң болгаш кылыр чүүлдериниң капсырлажып турар чүүлдерин чайладыры. Шолбан Кара-оолдуң эрттиргени чөвүлел хуралга саналдарны Тудуг болгаш ЧКА яамызының, Күрчагыгны башкарарының талазы-биле яамының удуртулгазының, Чазак Даргазының оралакчызы Александр Брокерттиң киржилгези-биле сайгарган. 

Ол чаартылганы кылырынга республиканың Саң-хөө яамызы чогумчалыг түңнелди берген дээрзин база Тудуг яамызының удуртукчузу Владимир Фалалеев дыңнаткан.

 Чаартылганың ажыктыын ылаптыг сайгарарын Тываның Баштыңы ТР-ниң Тудуг яамызынга сүмелээн. Чижээ, капитал тудуг эргелелиниң тудуг объектилериниң талазы-биле чарып алган керээлери бар, ол чиңгине керээ чарыкчызы болганда, ол ажылдарны күүседир ужурлуг. Ол ышкаш албан чериниң кадр составын шынарлыг сайгарарын база дааскан.  

 Аварийлиг чуртталга бажыңнарындан хамаатыларны өскээр көжүрер программа-биле туттунуп турар бажыңнарның акшаландырыышкынында бергедээшкиннерни база көрген. Регионнуң Баштыңы тудуг ажылдарының акшаландырыышкынында казначей үделгези-биле байдалды сайгарып, ооң түңнелдерин Россияның Тудуг яамызынче, ЧКА-ның эде тудуушкун фондузунче, РФ-тиң Казначействозунче дамчыдып, хөй каът бажыңнар тудуун доозары-биле тудуг организацияларының керээ езугаар кылган ажылдарынга төлевир системазын киирериниң аргазын көөр.  

 Республиканың удуртукчузу «Чуртталга-коммунал ажыл-агыйының эде чаартылгазын деткиир фонд» күрүне корпорациязының хайгааракчы чөвүлелиниң даргазы Сергей Степашин-биле ужурашкаш, ол айтырыгны чугаалашкан турган. Шолбан Кара-оол дугуржулгаларның шупту аргаларын федералдыг деңнелге дарый ажылдап, тудугжуларның акшазын үе шаанда шилчидер даалганы берген.