Тываның Баштыңы терроризмге удур комиссияның хуралын эрттирген

 Тыва республика Чазааның чанында терроризмге удур комиссияның даргазы Шолбан Кара-оол хуралды ажыдып тура, кады ажылдажылга айтырыгларынга доктаамал кичээнгейи дээш өөрүп четтиргенин илереткен.  

 Өөредилге албан черлерин террорисчи үүлгедиглерден камгалап турарының байдалының дугайында отчетту Тываның өөредилге болгаш эртем сайыды Татьяна Санчаа кылган. Ооң киирген медээлеринден алырга, организацияларның ниити санынга хамаарыштыр республиканың албан черлериниң 62 хуузунуң телефоннарында дугаар тодарадыр херекселдер бар, ИХЯ-ның дежурный кезээнче үнер дүвүрээзин медээзин бээр кпопкалар 50 хуузунда, видеохайгаарал системазы 43 хуузунда тургустунган, девискээрниң даштыкы талазын долузу-биле чырыдып турар черлер 100 хуу болуп турар. Амгы үеде комплекстиг план езугаар өөредилге объектилериниң камгалалын күштелдирер ажылдарны кылып турарын сайыт дыңнаткан. 

 Терроризм айыылындан камгалалды хандырарының талазы-биле эрттирген хемчеглерниң дугайында республиканың кадык камгалал сайыдының оралакчызы Белекмаа Монгуш илеткээн. Ооң чугаалап турары-биле алырга, терроризмниң айыылындан камгаланырынга белениниң хыналдазын медицина албан черлериниң шуптузунга хыналда чоруткан, оларның түңнели-биле организастыг хемчеглерни алган, четпестерни чайлаткан. Амгы үеде оран-саваларның камгалалын күштелдирген, эрттирилге чурумун киирген, видеохайгаарал системазын тургузуп, дүвүрээзин кпопкаларын болгаш өрт медээзин контрольдап турар.  

 Россияның Айыыл чок чорук албанының ТР-де эргелелиниң начальниги Владимир Щуровский социал адырның албан черлериниң камгалалын организастап турарында чамдык четпестер барын дыңнаткан. Эрге-хоойлу камгалаар тургузугларның илереткен четпестерин кыска хуусаада чайладырын республика Баштыңы сайыттардан негээн:

 «Таптыг көрүп көрээлиңер. Бистер ыракта бис, чүү-даа маңаа келбес дээн кенен сеткил бодаан херээ чок. Чок. Амгы байдалдардан алгаш көөрге, сайгарып тура айтырыывыс чугула тема-дыр, кажан ол бистиң ажы-төлүвүстүң кадыының, салым-чолунуң дугайында болганда. Ынчангаш удуртукчулар акша чогунга сылдавайн, чырыдылга, видеохайгаарал, дежурный албанының дээштиг болгаш билдилиг ажылын хандырар ужурлуг. Албан чериниң, яамының удуртукчузундан ол дыка хамааржыр. Террорисчи кыжаныглардан кижилерни камгалаарынга шупту күжениишкиннерни салыр апаар бис».

  Чөвүлел хуралга элээдилерни болгаш аныяктарны айыылдыг террорисчи шимчээшкиннерниң салдарындан камгалаар айтырыгга аңгы доктааган. Аныяктар-биле ажылды комплекстиг чорудар, аңаа чүгле Өөредилге яамызы, Аныяктар яамызы эвес, Культура яамызы, Кадык камгалал яамызы, өске-даа албан черлери киржир ужурлуг дээрзин республика Баштыңы демдеглээн. Өөредилге албан черин боттарының хайгааралынга алыр күзелдии дээш эрге-хоойлу камгалаар тургузугларның комиссияларының кежигүн­не­рин­ге өөрүп четтиргенин ол илергейлээн. Ындыг хевирлиг шефтээшкин элээди оолдарның болгаш уругларның угаан-медерелинге эки салдарлыг болур ужурлуг деп хуралдың киржикчилери санааннар.  

 Терроризмге удур комиссияның хуралынга организастыг айтырыгны база чугаалашкан. Комиссияның составынга Шолбан Кара-оолдуң саналын езугаар Чазак Даргазының республикада информация политиказын харыылап турар оралакчызы Максим Тунев кирген.