Тывада Россияның элээдилер ортузунга бокс маргылдаазынга киржир спортчулар илереттинер

 Тывада эртип турар округ маргылдаазында Сибирьниң 12 регионундан 200 хире спортчулар келген. Эң хөй боксерлар Красноярск крайдан, Новосибирск биле Кемерово областардан. Тренер башкы Рудольф Монгуштуң удуртулгазында 12 спортчу Тываны төлээлээр. Спортчу байырлалдың ажыдыышкынында «Саяннар» национал ансамбльдиң артистери оюн-көргүзүүн бараалгаткан. Тываның Баштыңы Шолбан Кара-оол маргылдааның киржикчилеринге байырны чедирген:  

 "Сибирьде – бистиң ниити черивисте келгениңерде өөрүп тур бис. Улуг девискээривистиң кезээнче бистиң Тывавыс база кирген. Бо маргылдаа Силерге тааржып, уттундурбас сактыышкын болуп арттарын күзээр-дир мен. Эш-өөрнү, чоок кижилериңерни моон тып алыр боор силер. Аалчылар келирге, өөрүшкү-биле уткуп алыры – бистиң ада-өгбелеривистен дамчып келген чараш чаңчылывыс-тыр! Тулган дээн боксерлар мында чыглып келгенин билир мен. Ийе, тулган дээн, чүге дизе дараазында чада - Россия маргылдаазы оларны манап турар. А оон – олимпийжи чадалар. Силерниң араңарда келир үениң олимпийжи чемпионнары бар чадавас, кым билир ону? Олимпийжи чемпион болурун шуптуңар күзеп турарыңарга бүзүрээр мен. Эң-не, эң-не дээн кижи шылгарап, тиилезин! Судьяларга эки кадыкшылды, база шынчы шииткелди күзеп каайн. Көрүкчүлер мындыг маргылдааларга ынак болгаш, оюннарже кайы хире кичээнгейлиин көөр силер». 

 Аалчыларга хүндүткелдиң кезээ, онзагай бир чүүл – хөөмей күүселдези болганын Тываның Баштыңы чугаалаан. Тываның улустуң хөөмейжизи Мөңгүн-оол Ондарның сыгыт-хөөмейи спортуларның хей-аъдын улам көдүрүп, үргүлчүлелдиң адыш часкаашкынынга төлептиг болган.  

 "Чараш тулчуушкуннар, шынчы шииткел, база эң шыырак кижи тиилезин!» - деп маргылдааның кол судьязы, Новосибирскиден келген, АИБА делегей чергелиг категорияның судьязы Владимир Цыганцов чагаан. СФО-да судья коллегиязының даргазы, АИБА делегей чергелиг категорияның судьязы Роман Малаев СФО-нуң бирги чери дээш маргылдааны техниктиг делегат бооп хайгаараар. Бокс маргылдаазы апрель 1-де доостур. 2017 чылда регионнар аразының база бүгү-российжи албан езузунуң спортчу маргылдааларының дугайында дүрүм езугаар бо оюннар эртип турар. 

 Бо хүнде Тывада, республиканың 26 спортчу албан черлеринде, 16 муң хире оолдар, уруглар барып турар, оларның 1189-зу бокс секцияларында. Тес-Хем кожууннуң элээди уругларның спорт школазында 158 кижи бокс-биле белеткенип турар. Республика чергелиг бокс маргылдаалары база студентилер аразынга Сибирь чемпионаттары Тывада доктаамал эртип турар. 2000 чылдан бээр кыс уруглар аразында бокс база нептерээн – 100 хире уруглар секцияларда хаара туттунган.