Тывада аныяктар эгелээшкининиң шуулганы болуп эртер

 Тываның Баштыңы @ Sh kara-ool Шолбан Кара-оолдуң республиканың Улуг Хуралынга (парламентизинге) Айыткалында чарлаан Аныяктарның бот-идепкейиниң чылын шуулган-биле эгелээр. 

 Тываның Аныяктар херектери болгаш спорт яамызы аңгы-аңгы адырларда ажылдап турар чаа, идепкейжи аныяктарны тывары-биле ону организастаан. Күүсекчи эрге-чагырганың адырлар аайы-биле органнарында быжыглаттынган аныяк специлистерниң ниитилежилгелерин xөвүлелдер база өске-даа профессионал каттыжыышкыннар кылдыр тургузар. Аныяктарның ажылдарының түңнелдери-биле чыгдынган болгаш деткээн шупту төлевилелдерни шуулганда таныштырар.

  Март 28-те Тыва культура төвүнге шуулган бодунуң ажылын «Иштики экология» шөлге эгелээр. Чурттакчы чоннуң арагалаашкыны болгаш кем-херек үүлгедии, чоннуң кадыын камгалаары, амыдыралдың кадык овур-хевирин база күш-культураны суртаалдары-биле холбашкан айтырыгларны шиитпирлээр оруктарны тывары – кол сорулга. Шөлчүгештиң киржикчилери «Элээр Тыва» шимчэшкинни тургузар саналды көөр. 

 Марттың 29-та ол-ла төпке, республикада патриотчу кижизидилгени нептередир айтырыгларга тураскааткан «Тыва – эрес-дидим чоруктуң девискээри» шөл ажылдаар. Ооң киржикчилери «патриотчу чорук» база «эрес-дидим чорук» деп билиишкиннерни тодарадып, патриотчу ниитилежилгелерни тургузарынга херек кырында кандыг чүүлдер тааржырын, аныяктарның амгы маадырлары кандыг болур ужурлуун чугаалажыр. Ооң ажылынче хоочуннар организацияларының төлээлерин, 55-ки даг-адыгжы бригаданың шериг албанныгларын чалаан.  

 Март 30-де, Тываның күрүне университединге, шуулган ажык дискуссия шөлү-биле ажылын доозар. Аңаа Тыва Республиканың идепкейлиг аныяктарын мөөңнеп чыыры-биле күрүнениң аныяктар политиказының кол хевирлерин, аргаларын база ужур-утказын тодараткан «Аныяктар - 2030» стратегияны сайгарып чугаалажыр. Аныяктар херектериниң талазы-биле федералдыг агентилелдиң СФО-да АХК органнары-биле кады ажылдажылга талазы-биле эргелелдиң начальниги Юрий Быкадоров ооң ажылынга киржир. 

 Шуулганның төнчү пленарлыг дискуссиязы Улусчу чогаадылга бажыңынга эртер. Ужуражылгада аныяктарның боттарының эгелээни, ТР-ниң Аныяктар яамызының болбаазыратканы болгаш хайгааралга алганы төлевилелдерни таныштырар. Төнчү дискуссияның кол сорулгазы – тодаргай төлевилелдер талазы-биле аныяктарның идепкейин көдүрер ажылдарның чаа арга-хевирин таныштырары болур. Ажык дискуссияның президиум кежигүннери активчилерниң таныштырылгаларынга үнелелди берип, боттарының шиитпири-биле оларны деткиир. Оон аңгыда улуг калбак төлевилелдерни боттандырарынга аныяктар күзелин маңаа көргүзер.