2017 чылда уругларның кадыкшылга кампаниязының түңнели-биле Тывада дыштанылганың тулган албан черин тодарадыр

 2017 чылда Россияның болгаш Тываның кадыкшылга албан черлеринге 7-15 харлыг уругларның 45 хуузу азы 23,6 муң кижи дыштаныр. 

 Чайгы дыштанылга кампаниязын эрткен чылга деңнээрге 7,3 хуу хөйге - 113 390,3 муң рубльге акшаландырар. Акшаландырыышкынның хөй кезии - 87 951,4 муң рубли республика бюджединден, ооң иштинде амыдыралдың берге байдалынга таварышкан уруглар болгаш элээдилер дыштанылгазын организастаарынче – 30155,0 муң рубль акша көрдүнген. Муниципалдыг бюджеттен 16 558,1 муң рубль акшаны ынаар угландырар.

 Чайгы үеде республика девискээринге 201 кадыкшылга албан черлери ажылдаар. Уругларның дыштанылга албан черлериниң паспорттарын болгаш реестрин чаартыр ажылдар январьда-ла эгелээн. Дыштанылга сезонунга белеткенип эгелээн организацияларның удуртукчуларынга лагерьниң оран-савазын септээрин, хоорай кыдыының стационар лагерьлеринче баар оруктарын баш бурунгаар белеткээрин, девискээрин саргыга удур арыгладырын, өртке удур айыыл чок чорукту хандырар ажылдарны кылырын сүмелээн. 

 Росхереглелхайгаарал албанының Тыва Республикада эргелелинче уруглар дыштанылгазының организастакчылары санитарлыг негелделер езугаар, кадыкшылга сезону ажыттынарынга чедир ийи ай бурунгаар, лагерьниң ажылдаарының дугайында дыңнадыгны киирер. Бо хүнде республиканың ийи кожууну база ниити өөредилгениң ийи албан чери ындыг дыңнадыгны киирген. Хоорайдан дашкаар лагерьже путевка өртээ эрткен чылга деңнээрге 710 рубль хөй, азы ортумаа-биле 11 340 рубль болур. А хүндүскү лагерьниң – 4095 рубль азы 1433 рубль хөй. Хоорайдан дашкаар стационарлыг кадыкшылга лагеринче путевканы боттары садып алган болза, уругнуң ада-иезинге азы хоойлу езугаар төлээзинге компенсация кылдыр путевка өртээниң 50 хуузун эгидери хевээр арткан. 

 Республиканың кожууннарындан 753 кижи кадыкшылга лагерьлериниң ажылдакчылар банкызында кирген, эрге-хоойлу органнары оларның дугайында медээлерни хынаан. Чайгы дыштанылга организастакчыларынга, башкыларга, вожатыйларга, күш-культура, эштириниң талазы-биле инструкторларга, кухня ажылдакчыларынга февральдан эгелеп республика, зона чергелиг өөредилгелерни эрттирип, мергежилдерин бедидип турар.  

 Чай дургузунда «Лагерьлерже – студент отрядтар» төлевилелди боттандырар. 225 кижини түр када ажылга тургустунар керээ-биле кадыкшылга кампаниязынче хаара тудар. Кожууннарда өөредилге эргелелдериниң удуртукчулары келир үениң башкыларынга төлептиг шалыңны бээрин өөренип көөр. Студентилер тускай угланыышкынныг ээлчеглерни хевирлээриниң методиказын ажылдап кылырынга идепкейлиг киржир. Экологтуг угланыышкынныг – 11, спортчу угланыышкынныг – 15, патриотчу угланыышкынныг – 13, лингвистика угланыышкынныг – 5, кадыкшыл быжыглаар – 9, «Аныяк армейжи» – 4, «Аныяк турист» деп - 4 лагерьлер ажылдаары бөгүн билдингир.