Тываның Баштыңы Шолбан Кара-оол РФ-тиң Президент Администрациязының удуртукчузунуң бирги оралакчызы Сергей Кириенко-биле ужурашкан

 Тываның Баштыңы Шолбан Кара-оол март 2-де Москвага ажыл-албан аайы-биле сургакчылап чорааш, РФ-тиң Президент администрациязының удуртукчузунуң бирги оралакчызы, иштики политика блогун харыылап турар Сергей Кириенко-биле ужурашкан.

 Бо чоокку чылдарда республиканың социал-экономиктиг хөгжүлдезиниң айтырыгларын аңаа сайгарганнар. Шолбан Кара-оол Президентиниң чарлыктарының Тывада күүселдезин, 2015 чылдың апрель 17-де РФ-тиң Чазааның доктаалы-биле бадылаан республиканың комплекстиг хөгжүлдезинге хамааржыр хемчеглерниң боттанылгазын, бо беш чылдарда регион чазааның кол угланыышкыннарда планнарын чугаалаан.

  Республиканың Баштыңы ужуражылга соонда бодунуң блогунда, Сергей Кириенко-биле Тыва дугайында чугаа сонуургалдыг болгаш эки күзээшкиннерлиг эрткен деп бижээн.