«Тува 24» телеканал «21-ги кнопканы» алган

 Март 1-де Роскомнадзорга Теледамчыдылга талазы-биле федералдыг комиссия хуралында регион телеканалдарын ыяап-ла чонга көргүзер эргени алырынга шилилдени чоруткан. Бо удаада Соңгу Кавказ болгаш Сибирь федералдыг округтарның каналдарын сайгарып көрген. Роскомнадзорнуң удуртукчузу Александр Жаров федералдыг комиссияны удурткан.

 Тывадан «21-ги кнопкаже» үш телеканал кордаан: «Тува 24», «Новый век» база «Кызыл-телесеть». Бадылаашкынның түңнели-биле, «Тува 24» регион каналы федералдыг комиссияның кежигүнериниң хөй үнүн алган. «21 кнопкаже» Алтай крайдан база Томск облазындан чүгле чаңгыс-чаңгыс канал семээн болза, Алтай Республика шуут киришпээн. Бүгүдеге чедингир канал дээш регионнардан колдуунда 2-3 телекомпаниялар кордаан.

 Теледамчыдылга талазы-биле федералдыг комиссия федералдыг округтар талазы-биле регион каналдарын ооң мурнунда дыңнаттынган график езугаар сайгарган. 2016 чылдың декабрь 30-ге чедир каналдар шилилдеге киржир чагыгны киирген болгаш, Роскомнадзорнуң территориалдыг эргелелдеринче чогуур дамчыдылгаларының бижидилгезин, документилерин болгаш таныштырылга роликтерни чоруткан турган.

 Россияның Президентизи Владимир Путин 2016 чылдың июньда регион телеканалдарынга «21-ги кнопканы» бээр дугайында хоойлуга атты салган. Россияның регион бүрүзүнге телеканалды харылзаа операторларының тарадыры албан. Ону өйлеп алыр болза, регион каналын бирги болгаш ийиги мультиплексче кирип турар федералдыг 20 телеканалдарның соонда көрүп болур