Уругларның катап эмнээшкин болгаш реабилитация төвү эрткен чылда ажылын түңнээн

 Республиканың уругларның катап эмнээшкин болгаш реабилитация төвү эрткен чылдың ажылын түңнээн болгаш келир чылдың планын сайгарган коллегия хуралын эрттирген.  

 Эрткен чылын төп 27 муң чашты азы республикада шупту уругларның 32 хуузун хүлээп алган. Оларның чүгле үш хуузу кадык болган, чүге дизе төпке колдуунда аарыг уруглар кадыкшылын быжыктырып турар.  

 Республиканың уругларның эмнээшкин болгаш реабилитация төвү 2011 чылда капиталдыг септелге соонда катап база чаштарны хүлээп эгелээнин сагындыраал. Мында назы хар аайы-биле массаж, кинезотерапия, физиоэмнээшкин, электрофорез, гидрокинезотерапия кабинеттери ажылдап, эмнээшкинниг күш-культура, эмнээр чоорган, спелеотерапия, магниттиг эмнээшкинни аңгы-аңгы аппараттар-биле чорудуп турар. Оон аңгыда бүүректерни, сыңыйны, ижин-хырынны УЗИ-биле шинчидип база болур. Педиатр, невролог, ортопед, стоматолог, отоларинголог дээш өске-даа тускай эртемниг эмчилер аарыг уругларны хүлээп алырынга белен.  

 2017 чылда төпке реабилитация дузазын чедирер, чыдып эмнээр 10 оруннуг салбырны ажыдары көрдүнген. Участок эмчизиниң бижии, диспансеризация түңнели азы ада-иениң күзели-биле комплекстиг шинчилгени төпке эртип болур.  

 Түңнел хуралда төптүң профилактиг ажылында чедиишкиннерни демдеглээн – уругларның боттарының кадыкшылынга хамаарылгазын экижидеринге, хоралыг чаңчылдардан ойталаарынга, арыг-силиг болурун угаадырынга, хазы-харының аайы-биле кадыын камнаарынга арга-сүмелерни ажылдап кылган.  

 Чурттакчы чоннуң кадыкшыл байдалын анализтеп көөрге, уруглар база улуг кижилернии дег – ханының базыышкыны улуг, таакпылаар, арага ижер, деңзизи артык база семис, кили четпес, дүвүрээзинниг болгаш муңгак байдалдыг, углеводтар солчулгазы шын эвес, чигир аарыгларлыг болганы илерээн. Элээдилер ортузунда таакпылаар чорукту чок кылыры, бичии кижиниң өг-бүлезинде таакпылаар кижилер барын илередири - профилактиктиг ажылдың кол угланыышкыны. 

 Ук албан чериниң тулган специализин коллегия хуралында илереткен. 2016 чылдың түңнели-биле «Тулган эмчи» деп атка Татьяна Сактаагай, «Физиотерапияның тулган эмчи сестразы» атка Айслу Чорунма, «Тулган эмчи сестразы» атка Эмма Монгуш, «Эки ажылдыг бүрүткекчи» атка Екатерина Колупаева, «Тулган массажтаар эмчи сестразы» атка Татьяна Турчина, «Тулган психолог» атка Марина Ооржак, «Эки ажылдыг санитарка» атка Саяна Иргит төлептиг болганнар.