Тывада чер участоктарын белеткеп кылырының хуусаазы кызырылган

 Республиканың Чер болгаш өнчү хамаарылгаларының яамызы 2017 чылда мурнады боттандырар ажыл-чорудулгалыг «Чедингир чер» төлевилелди ажылдадып эгелээн.

 Төлевилел офизи ол угланыышкын-биле аңгы-аңгы байдалдыг чер участоктарын белеткеп кылырда документилерни сайгарып көөрүнүң, чөпшээредириниң база бүрүткедириниң, ооң иштинде черниң кызыгаарын тодарадырының база өнчү ээзинче шилчидериниң хуусаазын 23 хонук кызырган. 

 Ооң мурнунда билдириишкин ээзи участогунуң шыйыын чөпшээредирде, чер болгаш өнчү хамаарылгаларының яамызы, черлер аразын демдегледип кылдырар компанияларже чаңгыс эвес удаа барып турган болза, ам чер шыйыын кылыр компаниялар-биле кады яамы амгы үениң технологияларын ажыглап, хамаатыларга белен документилерни бээрин төлевилел офизи таварыштыр кылырын чедип алган. Чер участогунуң схемазын бадыладыр билдириишкинни 30 хонук дургузунда көөр турган болза, ам 10 хонук апарган.  

 Оон аңгыда яамы бо чылдан эгелеп хөлезилээр, садып-саарар керээлерге эргениң күрүне бүрүткелин Росреестр албанынче боттары чорудуптарга, ону 10-дан 5 хонук иштинде кылыр. Межевание болгаш кадастр компаниялары-биле дорт ажылдаарынга электроннуг документ эргилдезин чорудар «Технокад-Муниципалитет» программаны яамы садып алган. «Чедингир чер» төлевилелди боттандырып тура, информастыг системага чаа фунцияларны болгаш модульдарны немей киирер. 

 Хөй талалыг ажыл-чорудулгалыг төптер болгаш күрүне ачы-дузазының порталы дамчыштыр хамаатыларның берген билдириишкиннери чаа программаже кирер болгаш хоойлужудулгада айытканы езугаар оон улаштыр күүсеттинер. Амгы үеде ведомство ТР-ниң Информатизация болгаш харылзаа яамызы-биле кады чер участогун бээр күрүне ачы-дузазының иштики дуза чедирилгезин хевирлээр ажылды кылып турар. Ачы-дузаның шынарын бедидери-биле ындыг хевирлиг иштики кезектерге чарар деп, ТР-ниң Чер болгаш өнчү хамаарылгаларының яамызы санап турар. 

 Чер болгаш өнчү хамаарылгаларының сайыдының оралакчызы Иван Ултургашев, электроннуг документ эргилдези ук адырда чидиг байдалды шиитпирлээринден аңгыда, операциялар чорудуунга контрольду күштелдирип, ооң ажык-чарлыын бедидер деп дыңнаткан. Ай санының мониторингизи ажылда четпестерни илередир.  

 Хамаатыларга таарымчалыг байдалдарны тургузуп, ачы-дузаның шынарын бедидер дээш яамы өрээлдерни септеп, чон хүлээп алыр черни улгаттырып, 4 ажылчын олутту немээн. Ведомство «Чедингир чер» төлевилели-биле мартта ажылдап эгелээринге белен.

 Тыва Республиканың өнчүзүнде болгаш ТР-ниң Чер болгаш өнчү хамаарылгаларының бүрүн эргезинде Кызыл-биле кызыгаарлашпайн турар черлерге чаартылгалар ажылдап эгелээр. Ведомство чылдың ийиги чартыында төлевилелче муниципалдыг тургузугларны чоорту киирер: специалистерге өөредилгелерни организастаар, техниктиг айтырыгларны шиитпирлээр.  

 ТР-ниң Чер болгаш өнчү хамаарылгаларының, ТР-ниң Информатизация болгаш харылзаа яамыларының, «Росреестр ФКБ» ФКБА-ның ТР-де филиалының, Күрүне регистрациязы, кадастр болгаш картография федералдыг албанының Тыва Республикада эргелелиниң киржилгези-биле бо чылдың төнчүзүнде «Чедингир чер» төлевилелдиң күүселдезинге ханы сайгарылганы кылыр.