Тываның Баштыңы Шолбан Кара-оол Бурятияның Баштыңының хүлээлгезин түр када күүседир Алексей Цыденовка чедиишкиннерни күзээн

 Бурятияның Баштыңының хүлээлгезин түр када күүседир кылдыр томуйлаткан Россияның транспорт сайыдының оралакчызы Алексей Цыденов дугайында Тыва Республиканың Баштыңы үзел-бодалын үлешкен. 

 «Акы-дуңмалышкы Бурятияны соңгулдаларга чедир удуртур улуг харыысалга мээң эжим, Россияның транспорт сайыдының оралакчызы А. Цыденовка онаашкан. Бөгүн ол Президент В.В. Путин-биле ужурашкан. Соңгулдаларга киржир болза өөрүүр мен, чүге дизе ону харыысалгалыг болгаш кижизиг удуртукчу деп билир мен. Бүгүдениң өмүнээзинден байырны чедиргеш, чедиишкиннерни күзедим!» - деп, соцчеткилерде бодунуң арнынга Кара-оол бижээн. 

  Алексей Цыденов Чита облазы чурттуг деп, «Ведомости» бижээн.

  Бурят Республиканың ооң мурнунда Баштыңы Вячеслав Наговицын бо чоокку үеде ону бүрүн эргелеринден хуусаа бетинде хостаар дугайында дилегни кииргенин дыңнаткан. «Ийи хуусаада ажылдадым. Үшкү хуусаада ажылдаар дээш киржип болур арга бар, ынчалза-даа бөгүн республикага өскертилгелер негеттинип келгенин үе көргүзе берген… Ынчангаш чаңгыс шын шиитпирни хүлээп алдым - үшкү хуусаага киришпес деп» - деп, ол дыңнаткан.