Тывага хоорай парктарын чаагайжыдар субсидияны аңгылаан

 РФ-тиң Чазаа 72 регионнуң аразынга 500 млн. рубльди үлээн чогуур доктаалды бадылаан. Чазак даргазы Дмитрий Медведев ол акшаларны 250 муң чедир чурттакчылыг хоорайларда парктар чаагайжыдылгазынче угландырарын айыткан.  

 Оон аңгыда ук субсидияны алырының чурумун доктаал-биле бадылаан. Тываның Чазаа ооң негелдези езугаар, март 1-ге чедир, РФ-тиң Тудуг яамызы-биле федералдыг бюджеттен акша-хөреңгини бээриниң дугайында дугуржулганы чарар. Оон республиканың чазаа парктарын чаагайжыдар хоорайларны апрель 1-ге чедир тодарадыр ужурлуг.

  «Таарымчалыг хоорай хүрээлелин хевирлээри» программаны Тывага боттандырар төлевилел офизин Шолбан Кара-оолдуң даалгазы-биле республикада ажытканын сагындыраал. 5 чылда санаан ол программа-биле федералдыг бюджеттен бо чылын республиканың хоорайлары эки бодалдыг кылган база амгы инфраструктураны тургузарынга 70 млн. ажыг рубльди хаара тудар. 2017 чылда Тываның найысылалы Кызылга база Ак-Довурак биле Шагаан-Арыг хоорайларга кол ажылдарны чорудар.