Чингиз Алиев биле Тамара Наводкина: Найырал ордени – бүгү Тывавыска шаңнал-дыр

 РФ-тиң Президентизиниң Чарлыы-биле Тываның Баштыңы Шолбан Кара-оолга күрүне шаңналы – Найырал Орденин тывыскан. Тываның Баштыңының адынга байыр чедииришкиннери кээп турар. 

  Чингиз Алиев, Тывада азербайджан диаспораның даргазы, каратэ тренери:  

 - Бедик шаңналды алганы дээш Шолбан Валерьевичиге Тываның девискээринде чурттап турар шупту азербайджаннарның база азербайджан диаспораның мурнундан байырны чедирип көрейн. Президент регионнарда удуртукчуларның ажылын дыка эки билир деп бодаар мен. Бистиң республиканың баштыңы Шолбан Валерьевич Тыва Республикада чурттап турар шупту чоннарны кезээде деткип чоруур. Кижилер эп-найыралдыг чурттазын дээш шупту аргаларны кылып турар. Шаңнал бодунуң ээзин шын тыпкан деп санаар мен. Шолбан Валерьевичиниң амыр эвес ажыл-ижинге ам-даа чедиишкиннерни күзедим. Ооң ажылы республиканы чедиишкиннерже эккээр! Шолбан Валерьевичиге база бистиң республикавыска чедиишкиннер кезээде делгерезин! 

 - Бистиң хүндүлүг президентивис Владимир Владимирович Путин Шолбан Валерьевич Кара-оолга Найырал орден тывысканын бөгүн дыңнадым. Бистиң чуртувуста Тываның Баштыңын ол хире бедик үнелеп турарынга дыка-ла өөрүдүм. Ол шаңнал чүгле Силернии эвес, а бистиң республикавыска база шаңнал. Ынчап кээрге чон бодун эки ап, эп-найыралдыг эки чурттап турары-дыр. Ол ынчаар артар-даа. Силерге аас-кежикти, ажыл-ижиңер-биле бисти кезээде өөртүп чоруур кылдыр быжыг кадыкшылды күзедим. Тайбың болгаш найырал бистиң черивиске кезээ мөңгеде турзун!