Россияның Президентизи Владимир Путин Тываның Баштыңы Шолбан Кара-оолду Найырал ордени-биле шаңнаан

 РФ-тиң Президентизи Владимир Путин дыка хөй хамаатыларны шаңнаарының дугайында чарлыкка атты салган. Күрүне баштыңы Юрий Григоровичиниң, режиссерлар Владимир Меньшов биле Александр Прошкинниң ачы-хавыяазын бедик шаңналдар-биле демдеглээн. Ооң дугайында чарлыкты эрге-хоойлу медээлериниң интернет-порталында парлаан.  

Улуг театрның балет труппазының балетмейстери Юрий Григорович январь 2-де 90 харлаан. Ыдыктыг Апостол Андрей Первозванныйның ордени-биле ада-чурттуң культуразын болгаш делегейниң хореография уран чүүлүн хөгжүдеринге шылгараңгай үлүг-хуузу, хөй чылдарда чогаадыкчы ажыл-чорудулгазы дээш ону шаңнаан.

 Кинорежиссер Владимир Меньшовка «Ада-чурттуң мурнунга ачы-хавыяазы дээш» орденниң II чергезин тывыскан. «Ада-чурттуң мурнунга ачы-хавыяазы дээш» орденниң III чергезинге режиссер Александр Прошкин төлептиг болган. Күш-ажылчы чедиишкиннери, идепкейлиг хөй-ниити ажыл-чорудулгазы болгаш хөй чылдарда ак сеткилдиг ажылы дээш Тываның Баштыңы Шолбан Кара-оолду Найырал ордени-биле шаңнаан. 

 Шаңнатканнарның аразында "МиГ" РСК-ниң ужудукчу-шенекчизи Вадим Селиванов база бар. Ол Эрес-дидим чорук орденин алыр. 2014 чылдың декабрьда Селиванов коллегазы Сергей Рыбников-биле МиГ-29КУБ хыдыкчы самолеттуң шенелде ужудуушкунун чорудуп тургаш, Чемодурово суурда бажыңнар болгаш школадан чайлады тутканнар.  

 ДКС-ке үр хуусаада үргүлчүлелдиг космиктиг ужудуушкун үезинде көргүскен эрес-дидим чоруу база бедик мергежили дээш Антон Шкаплеровту «Ада-чурттуң мурнунга ачы-хавыяазы дээш» орденниң IV чергези, а Олег Кононенкону «Ада-чурттуң мурнунга ачы-хавыяазы дээш» орденниң III чергези-биле шаңнаан. Тускай техниканы тударынга улуг үлүг-хуузу дээш "Вымпел" Москваның машина-тудуг заводунуң ажылдакчыларынга орден болгаш медальдарны тывыскан. 

 2015 чылда, РФ-тиң Президентизиниң Чарлыы-биле, Тываның Баштыңы Шолбан Кара-оолду ниитилелде чоннарның болгаш шажынның аразында тайбыңны болгаш чөпшээрежилгени быжыглаарынга улуг үлүг-хуузу дээш «Ада-чурттуң мурнунга ачы-хавыяазы дээш» орденниң II чергези-биле шаңнаанын сагындыраал.