2016 чылда Тыва көдээ ажыл-агый ярмаркаларының санын ийи катап көвүдеткен

 Тывада көдээ ажыл-агый продукциязын садып-саарган ярмарканың ниити саны 2015 чылга деңнээрге 2 катап көвүдеп – 752 четкен. Республиканың көдээ ажыл-агый яамызы тус черниң бараан бүдүрүкчүлерин деткээн ярмаркаларның түңнелдерин ТР-ниң Чазаанга таныштырган. Ярмарканың ниити санының өскени-биле чергелештир, ооң географиязы алгаан, оларның үш кезии кожууннарга эрткенин специалистер демдеглээн.

 Садыглаар шөлдер база улгаткатканын сайгарылга көргүскен. Амгы үеде республикада доктаамал ажылдыг 6 ярмарка төвү бар. Оларның үжү Тываның найысылалында: «Азия» биле «Сайзырал» шывыглыг рыноктар база Иркутская кудумчузунда ажык садыг шөлү. Артканнары Таңды, Чөөн-Хемчик база Өвүр кожууннарның төптеринде рыноктар. 2017 чылдың төнчүзүнде Шагаан-Арыг хоорайга шывыглыг рынок немежир, ону хуу инвестор «Олеся» КАК-тың акша-хөреңгизи-биле тудуп турар. 

 Ярмарка садыглаашкыны кожууннарда доктаамал эвес эртип турарын база демдеглээн. Тываның шупту көдээ кожууннарындан Кызыл кожуунга 48 санныг эң хөй ярмарка эрткен. Ийиги черде Чөөн-Хемчик, 2016 чылда 40 ярмарка болган. Сүт-Хөл кожуун 33 ярмарканы организастааш, үшкү черже үнген. Чеди-Хөлге 16, Тожуга 14, Каа-Хемге 13 база Өвүрге 10 ярмарка эрткен. Мөңгүн-Тайга биле Улуг-Хем кожууннар 8-8 ярмарканы эрттирген. А арткан кожууннар 1-ден 7 хире ярмарка садыглаашкынын чоруткан.

 Араттар болгаш хуу дузалал ажыл-агыйының ээлериниң киржилгези-биле кады муниципалдыг ярмаркаларга ортумаа-биле 15 хире бараан бүдүрүкчүлери киржип турар. 2016 чылда олар 19,7 млн. рубль ниити түңнүг продукцияны садып саарган. Кызылга көдээ ажыл-агый продукциязының ярмаркаларында 19,2 млн. рубльге бараанны саткан. Иркутская кудумчузунда ажык рынокка ооң эң хөй үлүү (12 млн. рубли) хамааржыр. Тывада көдээ ажыл-агый ярмаркаларының ниити саарылгазы 39 млн. рубль чедип турар.