«Чаңгыс демниг Россия» партияның Дээди чөвүлелиниң чаа составынче Тываның баштыңы кирген

 Тываның Баштыңы Шолбан Кара-оол Москвага эрткен «Чаңгыс демниг Россияның» съездизинде партияның Дээди чөвүлелиниң чаа составынче соңгуткан. 

 Дээди чөвүлел – эрге-чагырга партиязының ниити партийжи съездизиниң соонда, ооң хөгжүлдезиниң стратегиязын тодараткан ийиги удуртулга органы болур. «Чаңгыс демниг Россияның» төп удуртукчу органнарынче чазак даргазындан аңгыда, Тываның үш төлээзи кирген. Дээди Хуралдың спикери Каң-оол Даваа, Күрүне Думазының депутады Лариса Шойгу партияның Чиңгине политиктиг чөвүлелиниң кежигүннери болганнар. А сенатор Оксана Белоконь «Чаңгыс демниг Россияның» Төп контроль комиссиязының составынче кирген. 

 Шолбан Кара-оол съездиде тыва делегацияның чедиишкиннериниң дугайында Контактыда бодунуң блогунда дыңнаткан. Тываның «Чаңгыс демниг Россияның» удуртулга структураларында ындыг калбак төлээлээшкини - сентябрь соңгулдаларында партияның 82 ажыг хуу үннү алганында деп, ол санап турар.  

 «Бистиң Тывавыска ол хире төлээлерни алганывыста утка бар. Федералдыг төпке бистиң ресубликаның сонуургалдарын камгалаарынга ол күчүлүг шөл-дүр. Бодувус талавыстан ону эпчок байдалга таварыштырбас бис, чүге дизе бистиң чаңгыс чер-чуртугларывыс кайы партия боттуг ажылдарны кылып турарын ылгап билир апарган!» - деп, республика Баштыңы демдеглээн. 

 Съездиде «Чаңгыс демниг Россия» партияның, Тываның база идепкейлиг киржип турары, чаа эгелээшкиннерин деткээн. Оларның аразында «Хоорай хүрээлели» (хөй-ниитиниң шөлдерин чаагайжыдарынче 20 млрд. руб.), «Бичежек хоорайларның парктары» (250 муң чедир чурттакчылыг хоорайларда парктарның комплекстиг чаагайжыдылгазы), «Тус черниң культура бажыңы» (50 муң чедир чурттакчылыг хоорайларда көдээ клубтарның, культура бажыңнарының септелгези), база ол ышкаш «Бичежек хоорайларның театрлары» (доктаамал репертуарлыг болгаш чогаадыкчы труппалыг театрларны деткиири) дээн ышкаш төлевилелдер бар.