ТЫВАДА РОСКОСМОСТУҢ ТӨЛЭЭЛЕРИ АЖЫЛДАП ТУРАР

 Роскосмостан база ракета-космос үлетпүрүнден бөлүк специалистер, декабрь 1-де аңдарылган "Прогресс МС-04" космиктиг аппараттың бузундуларын тып база чыыры-биле, Тывада чедип келген. Тываның Баштыңы Шолбан Кара-оолдуң даалгазы-биле, ооң оралакчызы Анатолий Дамба-Хуурак Роскосмостуң төлээлери база республиканың эрге-чагырга органнарының удуртукчулары киришкен ажылчын хуралды эрттирген.

  Чер кырының космиктиг инфраструктура объектилерин ажыглаар төптүң специалистери, Россияның Эртемнер академиязының Суг болгаш экология айтырыгларының талазы-биле институттуң экологтары Тывада келген ажылчын бөлүктүң составында кирген. 

 "Тыва Республиканың специалистерин бөлүүвүске хөйү-биле киириштирер бис. Кады ажылдап тура, оларның айыыл чогун элээн бүзүредип көргүзер дээш. Алтайдан Кызылче ужуп кээрде, бузунду тывылган черге база хондурдувус. Бир бузундуну алгаш, шинчиледивис. Ам-даа бузундулар бар чадавас. Корабль 200 км. хире бедикке чазылган болгай. Космиктиг аппараттың 10 хире хуузу черде дүшкен, а артканнары агаарның дыгый каъдынга хып калганынга бүзүрээр бис. Тогланчылар турары чадап чок. Ынчангаш черде дүшкен бузундуларны чыып, шинчилээр дээш, мында келгенивис бо» – деп, Чер кырының космиктиг инфраструктура объектилерин ажыглаар төптүң кол специализи Игорь Ляховенко чугаалаан. 

 Тыва Республиканың Орук-транспорт комплекизиниң яамызы, ТР-ниң ОБЯ-зың КЭ, Тываның ХБ база ОБ албаны, Росбойдус хайгааралы база Росхереглекчилер хайгааралының эргелелдери болгаш өске-даа ведомстволар-биле кады ажылдажылга айтырыгларын хуралга сайгарып чугаалашкан.  

 2016 чылдың декабрь 1-де Байконур космодромундан «Прогресс МС-04» чүък корабли ужуп үнгенин сагындыраал. Тыва Республиканың чедери берге, кижилер чок, даглыг девискээриниң кырынга, 190 хире километр бедикке, ужудуушкуннуң 382 секундазында, штаттан дашкаар байдалдың уржуундан чүък транспорту читкен. Агаарның дыгый каъдынга ол колдуунда-ла хып каан. 

 "Чурттакчы чондан улуг дилээвис, бир эвес тус черниинге чытпаан кандыг-ла-бир чүүл тып алзыңарза, ону ОБЯ шугумунче дыңнадып, специалистер келгижеге аңаа дегбеңер. Дүшкен бузундуларның чаңгызында-даа радиация истери база ракетаның одаар чүүлүнүң холуксаазы чогун билир бис. Олар айыыл чок-тур ийин. Ындыг болзажок, агаардан дүшкен бузундуларның характеристиказын тургузарда, черге дүшкен черин демдеглээр апаар бис» - деп, Игорь Ляховенко чугаалаан. 

 Дилээшкин ажылдары элээн каш хонук үргүлчүлээр. Баштайгы ажылдарны чоруткан соонда, ам-даа дилээр бе азы ону чайгы үеде уламчылаар бе дээрзин шиитпирлээр. «Прогресс» ЧТК-ның хыппайн барган үш кезээ тывылганын документ-биле бадыткаан, оларның чуруктарын «Энергия» РКК база «Прогресс» РКТ-ге экспертиза эрттирери-биле чоруткан.