Тывада ажыл чок кижилерниң саны 2016 чылдың төнчүзүнге деңнээрге 3,4 муң кижиге эвээжээн

 Ажыл чок кижилерниң албан езузу-биле 2016 чылдың декабрь 1-де санын Тываның Күш-ажыл яамызы бүрүткээн. 2015 чылдың ол үезинде 21,7 муң кижи турган болза, амгы үеде оларның саны 18,3 муң дээрзин яамы дыңнаткан.  

 Ажыл чоктарның деңнели 14,2 хуу турганындан, 3,1 хууга эвээжээн. Чуртта экономика 2015 чылдың эгезинде баткан турда, Тывага ажылчоктарның деңнели 19 хуу ажыг турган.  

 Ажыл чок кижилерниң санының кызырылганын элээн каш чылдагааннар-биле тайылбырлап болур. Бирээде, ажыл берикчилери ажылчыннарын калбаа-биле үндүрерин 2016 чылда болдурбаан. Декабрь 1-ге чедир кызырылда болур дугайында дыңнадыышкынны ниитизи-биле 488 кижи алган, эрткен чылдың ол үезинде 900 хире кижи ажыл чок арткан.  

 Ажылга тургустунган хамаатыларның саны көвүдээн. 7,5 муң кижини ажылче хаара туткан. Республиканың 111, 2 муң чурттакчызы бөгүнде ажылдыг.  

 Күш-ажыл рыногунда байдалды экижидеринге «Аныяк өг-бүлеге кыштаг» губернатор төлевилели идигни берген деп, ТР-ниң Күш-ажыл яамызының специалистери санап турар. Көдээ черлерден 105 өг-бүле 200-200 баш хойну эрге-чагыргадан алгаш, фермаларны тургузуп, Тываның ажыл-агый комплекизиниң аңгы-аңгы адырларында 2699 кижини албан езу-биле ажылдаткан. 

 Оон аңгыда бо чылын ортумак болгаш биче сайгарлыкчы чорукту деткиир программа-биле 1 муң хире чаа ажылчын олуттарны тургускан. Чижээ, Сукпак суурда эът комбинады, Тываның элээн каш кожууннарында көдээ ажыл-агый продукциязын болбаазырадыр цехтерни аңаа хамаарыштырып болур. РФ-тиң Камгалал яамызының республика девискээринде кезээ – 55-ки мото-адыгжы бригадада 1300 ажыг кижини ажылда киирген.

  ТР-ниң Экономика яамызының ажылдап кылганы 2019 чылга чедир социал-экономиктиг даап бодаашкын-биле алырга, регионнуң күш-ажыл рыногунда дүшкүүрлүг байдалды чавырылдырарының тенденциязы келир чылын база хевээр артар.