Тывада дүшкен космиктиг корабльдиң бузундуларын хынаарга, айыылдыг бүдүмелдер чок болган

 Тываның Баштыңы Шолбан Кара-оол Роспотребнадзорнуң Тыва Республикада эргелелиниң ажылдакчыларын эрткен субботада, Улуг-Хем кожууннуң Эйлиг-Хем суурнуң чоогунда даг эдээнге тывылган «Прогресс МС-04» космиктиг корабльдиң бир бузундузун хынаары-биле чоруткан. Агаарны, харны, довуракты болгаш сугну алгаш хынааш, кижилерге болгаш бойдуска хоралыг бүдүмелдерниң барын тодарадыр даалганы берген. 

 Тываның Баштыңы Шолбан Кара-оол соцчеткилерде хөй санныг бижидип алыкчылары-биле Роспотребнадзорнуң ажылының түңнелдериниң дугайында үлешкен:  

 «Роспотребнадзорнуң Тывада эргелели Улуг-Хем кожууннуң девискээринде – даг эдээнда база өг чанында «Прогресс МС – 04» космиктиг корабльдиң ийи бузундузу тывылган черлерде хыналдаларны чоруткан. Харның кырыкы каъдындан, ажык суг бажындан хынаар чүүлдерни алган, агаарда химиктиг бүдүмелди хынаарынга херек анализатор-приборларны ажылында ажыглаан. Ол ийи таварылгада бедик ионнуг херелдениишкин чок болган, агаарда химиктиг бүдүмелдер илереттинмээн. Эйлиг-Хем суурда бир бажыңның хериминиң иштинден улуг эвес бузунду база тывылган. Ында база хыналдалар чоруп турар. Чаңгыс чер-чурттуглар, бир эвес кандыг-бир демир бузундузу тып алзыңарза аңаа дегбеңер, ооң дугайында бо телефонче дыңнадыңар: 8(39422) 9-99-99» 

 Баштайгы болгаш оон өске бузундулар тывылган черлерде хөй чурттакчы чок. Ол девискээрде 1 малчын турлаг бар. Кыштагда доктаамал чаңгыс кижи чурттап турар.

  Эйлиг-Хем суурда хуу бажыңның хериминиң иштинден база бир бузунду тывылган. Даштыкы хевири болгаш хемчээли-биле ол бузунду консерва демириниң адаккы кезээнге дөмей. Ында хөмүрленчек истер бар. Ол чүүлден база чоок кавы девискээрде улуг ионнуг херелдениишкин тывылбаан. Айыылдыг химиктиг бүдүмелдер (фенол, формальдегид, азот оксиди, күгүрлүг хей) ол девискээрде илереттинмээн.