Шериг хоорайжыгажында 55-ки аңгы мото-адыгжы (даг) бригадазының чаа өөредилгези эгелээн

 Иркутск облазының Нижнеудинск хоорайдан шериг бригадазы Кызылда ноябрь 27-де шупту чедип келгенин, «Тува 24» телеканал дыңнаткан. 

 55-и аңгы мото-адыгжы бригаданың 1300 дайынчызы шериг албанын ында эрттирип турар. Кышкы өөредилгениң бирги хүнүнде шупту байырлыы-биле чыскаалыпкан. Бо чылдың декабрь 1-ден эгелээн ээлчеглиг кышкы өөредилге шериг албанныгларга төрээн черинде эртип турары-биле онзагай хүн болган. 

 "Силер-биле элээн нарын байдалда бригаданы хевирлээн бис. Салдынган сорулганы күүседир дээн силерниң күжениишкиниңер болгаш чүткүлүңерниң, бригаданың офицерлериниң билдилиг удуртулгазының, шериг албанныг кижи бүрүзүнүң тура-соруунуң, Тываның Баштыңы Шолбан Валерьевич Кара-оолдуң бодунуң база республиканың шупту чурттакчыларының киржилгезиниң ачызында кандыг-даа байдалда өөредилге-дайынчы болгаш шериг даалгаларны күүседип шыдаар бригада тургустунган» - деп армияның 41-ги ниити-шериг штавының начальниги Рустам Мурадов чыскаал үезинде чугаалаан. 

 Шериглер «Дайынчы акы-дуңма» хөй-ниити организациязының, шажын чүдүлгелериниң, тудуг организацияларының база Солдат иелер комитединиң төлээлери-биле шериг езу езугаар мендилешкен. Дыка хөй шериг кезектеринге чораанын чугаалааш, ынчалза-даа мында онза-дыр дээрзин Елена Ондар демдеглээн. Чүге дизе шериг хоорайжыгаш Тываның территориязында турары-биле эвес, а көңгүс чаа туттунганы-биле.  

 55-ки аңгы мото-адыгжы бригаданың турумчуур шериг хоорайжыгажын куруг черде тудуп үндүрген. Россияның Тускай тудуунуң Сибирь талазы-биле кол эргелели Кызылда шериг хоорайжыгажынга шериг албанныгларның чурттаар болгаш албан эрттирер баштайгы объектилерин чоокта чаа хүлээткен. Байырлыг чыскаал улуг эвес парад-биле төнген.

  Шериг албанныглар чыскаал соонда өөредилгезинче аъттаныпканнар. Саперлар болгаш чадаг шериглер өөредилгезин кара адар черге эрттирген. Шериг техника-биле адар өөредилге оон эгелээр. 

 Бригада дагжы болганда, баштайгы хүнүнде-ле мото-адыгжылар дагларже белеткенип үнүпкен. Хаактап чедер чери чогум ырак эвесте. Арткан шериглер шериг хоорайжыгажының территориязынга белеткенир. 

  Россияның Тускай тудуунуң Сибирь талазы-биле кол эргелели Кызылга шериг албанын эрттиреринге бирги хереглелдиң чугула объектилерин бир дугаарында туткан. Шериг хоорайжыгажында беш ниитиниң чуртталга бажыңы, столовая, өөредилге корпузу, бригада штавы, батальон штавы, чыскаалыр шөл, ийи контроль-эрттирилге пунктузу, комплекстиг-склад оран-савазы, караул өрээли дээш, өске-даа тудугларны туткан. Объектилериниң төлевилелин кылып тура, национал аян-шинчини база архитектураны ажыглаан. Тудуглар быжыының, чер шимчэшкининге удур идегелдииниң, чылыг болгаш чырык камналгазының талазы-биле Росия Федерациязында хүлээп алдынган нормаларга болаш дүрүмнерге дүгжүп турар. Үш чүс ажыг гектар шөлдүг шериг хоорайжыгажынга аңгы-аңгы ужур-дузалыг ниитизи-биле 97 тудугну тудары көрдүнген.