КҮРҮНЕ ДУМАЗЫНЫҢ ДЕПУТАДЫ ЛАРИСА ШОЙГУНУҢ СТИПЕНДИЯЛАРЫН ТЫВА СТУДЕНТИЛЕРГЕ ТЫВЫСКАН

 Юридиктиг, төөгү, экономика факультеттериниң база педагогика колледжизиниң алды студентизи бо чылын спипендияның алыкчылары болган. 

 Тываның күрүне университединиң хүндүскү өөредилгезиниң студентилеринге Күрүне Думазы Лариса Шойгунуң адындан стипендияларны 2011 чылдан бээр тыпсып турар. Келир үениң юристеринге хоойлу төлевилелдерин ажылдап кылырын ол сүмелеп, стипендия алыкчыларынга оон-даа чедиишкиннерни күзээн. 

 «Мөөрейниң тиилекчилери болганыңарга өөрүп тур мен. Чагыглар хөй кирген, ынчангаш элээн нарын болганы чугаажок. Хөйнү кылып шыдаарыңарга бүзүреп, ону шынзыткан силер. Бистиң респуликавыстың келир үези силерде дээрзинге бүзүрелдиг мен» - деп, Күрүне Думазының депутады Лариса Шойгу чугаалаан. 

 Конкурс комиссиязының шиитпиринге үндезилээш, конкурстуң түңнелдери-биле стипендияларны тыпсыр. Студентиниң өөредилгеге чедиишкиннерин, аңгы-аңгы олимпиадаларга болгаш чогаадыкчы мөөрейлерге, эртем-практиктиг конфернцияларга тиилелгелерин түңнел үндүрерде барымдаалаар. Эртем статьялары бар болза, улам эки. 

 «Менеджменде IT-технологиялар, удуртукчунуң ажыл-агыйжы харылзааларының талазы-биле ажылдарны, экономика талазы-биле каш янзы статьяларны, курс ажылдарын бижээн мен» - деп, Тываның күрүне университединиң экономика факультединиң студентизи Валерия Думанян чугаалаан. Стипендия алыкчыларының санынче ТывКУ-нуң юридиктиг факультединиң студентизи Ай-Херел Арган-оол база кирген. Ол башкыларының сүмези-биле документилерин дужааган. 

 Күрүне Думазының депутады Лариса Шойгунуң стипендиязы – өске студентилерге база эки өөренип, чедиишкинниг болурунга улуг идиг.