Шолбан Кара-оол соңгулда комиссиязынче документилерин дужааган

 Тыва Республиканың Баштыңының хүлээлгезин түр када күүседип турар Шолбан Кара-оол, 2016 чылдың сентябрь 18-те, регион Баштыңының хуусаадан эрте соңгулдаларынга киржир дээш, чогуур документилерин республиканың Соңгулда комиссиязынче август 2-де дужааган. 

  «Бир дугаар эвес соңгулдада киржип турар хиремде, дөмей-ле хөлзеп тур мен, чүге дээрге чаңгыс бодум эвес болгай мен, мээң артымда муң-муң чаңгыс чер чурттугларым бар. Олар менче: «Сен шыдаар сен, сен ууптар сен. Ынчангаш чүгле бурунгаар!» деп бижип турарлар» - деп, Шолбан Кара-оол бодунуң блогунда бижээн.

  «Чаңгыс демниг Россия» партиязындан депшиткен Шолбан Кара-оолга, соңгулда комиссиязының ажылдакчылары документилерни хүлээп алганының бадыткалын болгаш соңгулда фондузу тургузарынга аңгы агар санын ажыдар чөпшээрелди берген. 

 2016 чылдың мартта, Владимир Путинден Шолбан Кара-оол 2017 чылдың мартта доостур бүрүн эргелерин хуусаадан эрте халаар дугайында дилегни кииргенин сагындыраал. Ол 2016 чылдың сентябрьда республика баштыңының соңгулдаларынга киржир деп турарын ынчан дыңнаткан. Күрүне баштыңы ооң халажып турарынга удурланмайн турарын, харын-даа Тывага эртер соңгулдаларга чедиишкинниг болурун күзээн. Шолбан Кара-оолдуң удуртулгазы-биле республика эки хөгжүп турарын, бүгүдеге билдингир айтырыгларны шупту шиитпирлээрин чугаалаан.