Тываның Баштыңы Шолбан Кара-оол база ооң губернатор коллегалары боттуг херектер база бүдүрүлгелер кылырынга эп-найыралын ажыглаарлар

 «Мен база губернатор коллегаларым аравыста эп-найырлалывысты, бистиң регионнуң чаагай чоруунга дээш, ажыл-агыйжы чорудулгавыска ажыглап турар бис. Татарстанның Президентизи Р.Н. Минниханов-биле «Туран» сыын ажыл-агый баазазынга турисчи кластерни сайзырадырының дугайында дугуруштувус. Удавас Подмосковьениң губернатору А.Ю. Воробьевтуң келирин манап турар бис. Агросекторда ооң-биле дугуржур ниити төлевилелдеривис бар. Тываның Чазаа РФ-тиң хөй-хөй регионнарының удуртукчулары-биле дугуржулгаларын чарган. Инвестиция климадынга хамааржыр документилерни, хоойлуларны, актыларны чедир ажылдап, чөпшээрел бээр ажыл-чорудулгаларны бөдүүнчүдүп, Тываже инвестицияларга «ногаан» орукту хандырар херек. Чазак кежигүннеринге ындыг даалгаларны бердим» - деп, Тываның Баштыңы Шолбан Кара-оол бодунуң блогунда бижээн. 

 Татарстанның Президентизи Руслан Минниханов-биле тыва турисчи төлевилелге инвесторларны киириштирер айтырыгны телефон дамчыштыр чугаалашканын, Шолбан Кара-оол аппарат хуралында дыңнаткан. Бо чоокку хүннерде, Тыва таланың чалааны-биле, кады ажылдажылганы тургузар сорулгалыг элээн каш билдингир кижилер келир. Июльдуң 18-те делегейде билдингир бизнесмен келген. Ооң-биле Петербургтуң экономиктиг шуулганының үезинде ужурашкаш, Тывага салыышкыннарны киирер чугааны кылганын Ш. Кара-оол чугаалаан. Бо удаада бизнесменниң маңаа келгени чүгле найыралчы эвес, а ажыл-агыйжы база угланыышкынныг. 

 Москва облазының губернатору Андрей Воробьев командазы-биле Тывага бо хонуктарда келир. Подмосковье-биле бистиң республикавыс Сергей Шойгу губернаторлап турар үеде-ле экономиканың аңгы-аңгы адырларынга ниити төлевилелдерни тургузуп, дугурушкан. Андрей Воробьевтуң келири, планнарны ам-даа калбарырынга база дүргедедиринге идиглиг. 

  Тыва чазак дыка хөй регионнарның удуртукчулары-биле ындыг дугуржулгаларны чарган. Июль 18-те телефон дамчыштыр харылзаа үезинде, оларны база катап чугаалашкан.