Тываның сайыттарынга хөй-ниити-биле кады сырый ажылдаарын хүлээндирген

 Тываның Баштыңы Шолбан Кара-оол республиканың сайзыралынга чугула эгелээшкиннерге база төлевилелдерге хамаарыштыр хөй-ниитиниң санал-оналдарын алыры чугула деп санап турар.  

 «Чоокта чаа муниципалдыг тургузугларның улуг шуулганынга «Бурунгаар, төрээн Тывам» улусчу шимчээшкинни республикага тургузар дээн хөй-ниитиниң санал-оналын деткидим. Сайыттар ындыг эгелээшкиннерни база деткизин. Адаандан үстүнге дээр  – эртемге, материалдыг болгаш саң-хөө курлавырларынга үндезилээн санаашкыннарны төлевилелдерге боттандырары-биле, кижилерниң санал-оналын хүлээп албышаан, ону болбаазырадыр хөй-ниити хүлээп алыышкын черлеринден эгелээш, «изиг шугум» дээн ышкаш сайгарылга албаннарын кожууннарга, ведомтволарга тургузуп, чазакче киирери чугула.  

 Яамыларның албан езунунуң сайтылары чон-биле, сайгарлыкчылар-биле ындыг харылзааны чүге тутпайн турарыл? Кижилер-биле харылзааны тудуп, оларның айтырыгларынга харыыны шак санында, хүн бүрүде берип олурар тускай специалисти интернет-курлавырга быжыглаар херек. Хөй-ниити-биле ындыг кады ажылдажылганы чорударын сайыт боду харыылаар ужурлуг. Кандыг-даа удуртукчунуң ажылынга үнелел бээриниң кол көргүзүү - чон-биле ажык-чарлыында база харылзаазында» - деп, Шолбан Кара-оол айыткан. 

 «Кижилерниң айтырыындан хуралдааны дээре деп бодап турар сайыттар бар болза болза, чазып тур, ындыг кижи олудун чайлап бергени дээре. Кижилерниң хүн бүрүде айтырыгларын шиитпирлээри-биле албан-дужаалда олуртканын утпаңар. Ол дээрге анаа-ла хоозун сөстер эвес-тир, бо Тывада күрүне болгаш муниципалдыг албанда кижилерге дорт хамааржыр» - деп, республика баштыңы Шолбан Кара-оол демдеглээн.