Патриарх Кирилл юбилейи-биле Шолбан Кара-оолга байырны чедирген

 Тыва Республиканың Баштыңының хүлээлгезин күүседип турар Шолбан Кара-оолдуң 50 харлааны-биле Москваның ыдыктыг Патриаргы база бүгү Русьтуң Кирилл байырны чедирген.  

 «Силерни бистиң чуртувуста чедиишкинниг болгаш идепкейлиг күрүне ажылдакчызы, белен эвес айтырыгларны дээштиг шиитпирлеп шыдаар бедик класстыг профессионал кылдыр билир база үнелээрлер» - деп, Патриарх байыр чедириишкининде демдеглээн.

 «Амгы үеде Тыва Республиканың баштыңы харыысалгалыг албан-дужаалды ээлеп тура, регионда көдээ ажыл-агыйы биле спортту, өөредилге биле эмчи ачы-дузазының чедингирин хөгжүдер адырда эки түңнелдерни көргүскен дыка хөй социал ужур-дузалыг төлевилелдерни, националдар база шажыннар аразында хамаарылгаларны быжыглаар ажыл-херектерни боттандырып турар Силер» — деп демдеглээш, республика чагыргазы-биле Орус Православ хүрээниң Кызылдың епархиязының аразында үре-түңнелдиг кады ажылдажылганы ам-даа уламчылаарынга идегелин илереткен. 

 Республиканың төөгүзүнде бир-ле дугаар, Россияның православ хүрээзиниң иераргы – Патриарх Кирилл 2011 чылдың августа, Тывага кээп чораанын сагындыраал. Тывага ооң келгениниң соонда Орус Православ хүрээниң Кызылдың Епархиязы тургустунган.