Тываның эрге-чагыргазы республиканың турисчи сорунзазының дугайында кыска хемчээлдиг кино тургузукчуларын грант-биле деткиир

 Республика чазаа регионнуң турисчи аргаларының дугайында кыска хемчээлдиг кино бүдүрүлгезиниң ортузунга конкурсту эрттирериниң дугайында дүрүмнү доктаадып, грантыларны тургускан. 

  Конкурска 18 хардан өрү назылыг кижилер база коммерцияга хамаарышпас организациялар киржир. Турисчи ачы-дуза рыногунда Тываны буруунгаарлаткан киноларны белеткээр чарыгдалдарның 15 хире хуузун кинотөлевилелдер конкурузунуң тиилекчилеринге грант хевирлиг тыпсырынга республиканың эрге-чагыргазы белен.  

 Конкурска киржир дизе, грантыже кордакчы Тываның турисчи күчүзүн көргүскен, бирээзи-ле 10 минутадан ашпас, 3 видеороликти киириштирер. Аңаа республиканың чонунуң культуразын болгаш амыдыралын, тураскаалдыг черлерин, архитектура тураскаалдарын база культура өнчү-салгалын, бойдус байлаан, тоолчургу чугаалары-биле сурагжаан объектилерни, аржаан сугларын, ыдыктыг черлерни база дүрүмде киирген өске-даа черлерни көргүзүп болур. 

  Конкурстуң тиилекчилери-биле чарган дугуржулгада грантыны боттуг чарыырының, ону бээриниң база ажыглаарының, хемчээлиниң, отчеттаарының чурумун база ийи таланың харыысалгазын айыткан. 

  Тываның Культура яамызы конкурска киржир чагыгларны июль 11-ден эгелээш август 11-ге чедир хүлээп алыр.