Тыва биле Калмыкияның баштыңнары Москваның мэри-биле российжи найысылалга буддийжи хүрээ тудуунуң айтырыын шиитпирлээр
30.06.2016
Тываның Баштыңы Шолбан Кара-оол биле Калмык Республиканың Баштыңы Алексей Орлов телефон дамчыштыр харылзашкан. Москвада Рерихтиң бүгү делегей төвүнүң территориязында туткан субурганга хамаарыштыр чугааны кылдывыс деп, Шолбан Кара-оол бодунуң блогунда бижээн.
Чөпшээрел чок туткан тудуг дээш, ону бузар часкан. Буддистер Россияның Президентизинче дилег чагааны киирген соонда, ону болдурбайн барган.
«Эжим, коллегам, Калмык Республиканың Баштыңы Алексей Орлов-биле чаа-ла телефоннаштым. Чаңгыс чер чурттугларывысты дүвүредип турар айтырыгларны бистиң удуртукчувус эки билирин дыңнааш кайгадывыс. Президент маргыштыг ол айтырыгда чүдүкчүлерниң талазында болуп, Москвада ол субурганны бузар дээн ажылдарны соксаткан. Харын-даа, бистерге, Москваның мэри-биле кады ажылчын бөлүктү тургузуп, чурттуң найысылынга буддисчи хүрээни тударының аргаларын тыварын сүмеледи. Президентивиске чоргаарланыр-дыр мен!» - деп, соцчеткилерде Шолбан Кара-оол бижээн.
Москвада Рерихтиң бүгү делегей төвүнүң девискээринде буддийжи архитектурлуг скульптура – субурган каастаттынмаан тудугга хамааржыр. Ону 2008 чылда «Россия – Индия – Тибет» фестиваль-биле Непалдан келген ламалар туткан. Ооң иштинде Төп Азиядан археологтарның тыпканы Будданың кезектери шыгжаттынган.
Возврат к списку
|