Тываның Чазаа Кызыл-Мажалыкта чаа үениң школа тудуун уламчылаар акшаны аңгылаан

 ТР-ниң Тудуг яамызынче 13,3 млн. рубльди шилчидер дугайында айтыышкынга республика Баштыңының хүлээлгезин күүседип турар Шолбан Кара-оол атты салган. 

 Тываның Чазааның шиитпири-биле, Кызыл-Мажалык суурда чаа школа тудуун улаштыр тудар акшаны үндүрген. 2014 чылда эгелээн ол тудугнуң акшаландырыышкынының ниити түңү 64,4 млн. рубльга дең, ооң чартыы – Тываның бодунуң акша-хөреңгизинден болур. Бо чылын ынаар ниитизи-биле 26,6 млн. рубль акшаны углаар.  

 Республиканың өөредилге болгаш эртем сайыдының оралакчызы Светлана Ощепкова, бо дээрге амгы үениң негелдезинге дүүштүр туткан көдээ черде бирги школа болур деп тайылбырлаан. Эрткен чүс чылдың бирги чартыында туттунган эрги ыяш школаның орнунга 257 өөреникчиге, үш каът, бүгү талазы-биле таарымчалыг школа туттунар. 

 Амгы үеде «Восход» субподряд компаниязы бирги база ийиги каъттарның кырын дуглааш, үшкү каъттың ханаларын эптеп эгелээн. Ол бүгү ажылдар-биле чергелештир чылыг четкизинге кожар өске бүгү ажылдарны - котельнаяны эде чаартып, чылыг тарссазын шөйүп турар. 

 Республика чазааның бадылааны график езугаар, 2017 чылдың күзүн школаны ажыглалга киирер ужурлуг.