Тываның найысылалынга бир поликлиниканы немей тудар

 Тываның найысылалының эң улуг микрорайонунуң бирээзи – Южный бо чоокку үеде боду поликлиникалыг апаар. Шолбан Караоол ТР-ниң саң-хөө сайыды Орлан Достай-биле 2016 чылда республика бюджединиң дугайында хоойлуже немелделер база өскерилгелер киирерин сайгарып тура, шак ындыг шииитпирни хүлээп алган. 

  «120 муң кижи доктаамал чурттап турар Кызылда бөгүн, чүгле төп база чөөн микрорайоннарда – чүгле ийи поликлиника бар. Кызылдың мурнуу микрорайонунга чаа поликлиника тудуунче акша-хөреңгини тывар даалганы Саң-хөө яамызынга бердим. Ында туттунуп турар хөй каът объектиниң адаккы база бирги каъдын садып алыр херек. Хоорайга чаа поликлиника ажыдарын каш чылдар иштинде чугаалажып келген. 2015 чылда чазактың ажылының дугайында отчетту таныштырып, чон-биле ужуралгалар эрттирип турда, ол айтырыгны база катап көдүрген. Ынчангаш чаа эмнелге албан черин чоорту кылыр» - деп Шолбан Кара-оол бодунуң блогунда дыңнаткан. 

 1,3 муң дөрбелчин метр шөлдүг оран-саваны садып алырынга, баштайгы дээрезинде поликлиниканы дерииринге, баш удур санаашкыннар-биле, 42,2 млн. рубль херек. 2016 чылдың бюджединде ол төлевилелче 20 млн. рубльди углаары көрдүнген.  

 Муниципалдыг эрге-чагырга деңнелинге чаңгыс эвес он чылдар дургузунда, хоорайның хөй чурттакчылыг микрорайонунга амбулаторлуг-поликлиника дузазының албан черин ажыдарын сайгарып турган. Бо удаада чурттакчы чонга чугула херек поликлиника албан черин Южный микрорайонунга ажыдар дээш республика бюджединче чарыгдалдарны киирер шиитпир хүлээп алдынган. 

 Чаа поликлиника хоорайжыларга эмчи-социал ачы-дузаның чедингир чоруун бедидер ужурлуг.