Тываның Баштыңы Биче болгаш ортумак бизнести хөгжүдер федералдыг корпорация-биле дугуржулгага атты салган

 Тываның Баштыңы Шолбан Кара-оол биле «Биче болгаш ортумак бизнести хөгжүдер федералдыг корпорация» (БОС корпорациязы) АН-ның чиңгине директору Александр Браверман кады ажылдажылга дугайында дугуржулгага атты салганнар. Республикада биче болгаш ортумак бизнес айтырыгларының талазы-биле ийи тала кады ажылдаарын дугужулгада айыткан. 

  Кады ажылдажылганың кол угланыышкыннарында – сайгарлыкчы чорукту сайзыраңгайжыдары, чээли алырының чедингирин бедидери, БОС корпорациязының талазындан хүлээникчи база хамаарышпас магадылалдар бээр төлевилелдерни дилеп тывары, биче болгаш ортумак бизнес субъектилеринге информастыг, маркетинг, эрге-хоойлу, эт-хөреңги база өске-даа деткимчелерни көргүзери кирген. 

 Оон аңгыда сайгарлыкчы адырның сонуургалдарын илереткен коммерцияга хамаарышпас организацияларның ажыл-чорудулгазында, чедиишкинниг арга-дуржулгаларны шиңгээдип, ажыглаарда, сайгарлыкчы чоруктуң эге билиглерин өөредир системаны хөгжүдерде кады ажылдаар хүлээлгелерни чазак биле корпорация бодунда алган. 

 Чурттуң күрүне корпорацияларының чагыы-биле, Россияның рыногун дамчыштыр хандырылгага киржир дээш, Тываның сайгарлыкчыларының бедик технологиялыг болгаш инновациялыг продукциязын сүмелээр хемчеглер системазын ажылдап кылгаш, ону ажыглаары көрдүнген.