Андрей Монгуш: Тываның Баштыңының хей-аъды бедик. Шупту харыысалганы бодунга хүлээнип алыр соруктуг кижи
26.05.2016
Россияның Президентизи Владимир Путин-биле Тываның Баштыңы ужурашкаш, регион баштыңының хуусаа бетинде соңгулдаларны эрттирер шиитпирни хүлээп алганының, сентябрьда ол албан дужаалче кандитадуразын бээриниң дугайында Тываның Улустуң хөөмейжизи Андрей Монгуш бодалын илереткен:
«Эки медээ. Чурттуң президентизи бистиң республиканың Баштыңын быжыы-биле деткип турарын көрдүм. Ол эң-не кол.
Федералдыг медээлерге Владимир Путин Шолбан Кара-оолдуң регионну хөгжүдер талазы-биле ажыл-чорудулгазын бедик үнелеп, келир соңгулдаларга чедиишкинни күзеди. Чон Кара-оолду деткиир деп бодаар мен. Бодум хуумда, ооң тыва үндезин культураны, тыва улустуң чаңчылдарын, уран чүүлүн, дылын камгалаарынга киирип турар үлүг-хуузун кончуг бедик үнелээр мен. Хөөмей чылы, Игил чылы, Тыва чаңчылдар чылы, Тываның аалчыларынга хүндүткел чылын чарлааны - ол бүгүнүң бадыткалы.
Оон аңгыда Шолбан Кара-оол республиканың экономиказының кол үнедезини - көдээ ажыл-агыйны, мал ажыл-агыйын хөгжүдеринче улуг кичээнгейни угландырган. Оон бистиң чонувустуң чаагай чоруу хамааржыр. Көдээниң бөдүүн ишчилеринге, малчыннар, фермерлерге субсидия, көдээ ажыл-агый техниказы-биле боттуг дузаны көргүзүп турар. Ол ажылдың түңнелдери көстүп келген: бөгүн дыка хөй аныяктар ада-өгбелериниң кылып чораан ижи — мал ажылынче хаара туттунуп турар. Муңчу малчыннар көвүдеп турары — чоннуң амыдыралы экижип турарының демдээ.
Шолбан Кара-оол – чарт угаанныг, ханы билиглиг, езулуг удуртукчу деп бодаар мен. Шупту чүве дээш харыысалганы бодунга хүлээнип алыр соруктуг кижи. Лидер кижи ындыг болур ужурлуг. Кижилерни каттыштырыптар шынарлыг. Кара-оол ам-даа езулуг ажылдаар үезинде. Ооң хей-аъды бедик. Чон Шолбан Кара-оолду бо соңгулдаларда деткип, база катап республиканың баштыңынга соңгуп алыр деп бодаар мен».
Возврат к списку
|