Шолбан Кара-оол москвачы 16 студентиге дыштаныры-биле Тываже ужуп келиринге дузалажыр

 «Даңгына биле Тажы-2016» студент мөөрейни көргеш, Шолбан Кара-оол ындыг шиитпирни хүлээп алган. 

 «Москвага «Даңгына биле Тажы-2016» студентилер мөөрейин көөр аргалыг болдум. Араб Эмираттарынче аян-чорукту шаңнал кылдыр бергенин кайгадым. Төрээн черинге бердингени дээш, мөөрейге киришкен шупту 16 кижиге чайгы дыштанылгада Тывазынче чанар ужар билеттерни садып бээрин шиитпирледим! Төрээн республиказының салым-чолу дээш сагыш-човап, чонунуң чаагай чаңчылдарын сагып, бот-ботарынга дузалажып, аралажып, найыралдажып чорууру – эр-хей-дир! Россияның найысылалының академиктиг дээди өөредилге черлериниң студентилери болуп турарынга чоргаарландым!» - деп, Шолбан Кара-оол бодунуң блогунда бижээн. 

 Студентилер чанар авиабилеттерни белекке бергени дээш, өөрүшкүден өрү шурагылапкаш, деткимче дээш өөрүп четтиргенин илереткеннер. 

 Чыл санында эртер, чараш болгаш эрес-дидим чоруктуң «Москваның даңгыназы база тажызы-2016» национал мөөрей бо удаада, май 21-де Москва хоорайга 10 дугаар болуп, улусчу чаңчылдар чылынга тураскааттынган. 

 Ук хемчегге сенатор Мерген Ооржак хүндүлүг аалчы бооп четкен. П.И. Чайковский аттыг Москваның күрүне консерваториязының Академиктиг хөгжүм колледжизиниң доозукчу студентизи, салым-чаяанныг ыраажы Саян Дембирел биле Бурят Республиканың опера болгаш балет театрының артизи Кара-Монгуш Вероника мөөрейни башкарганнар.

 Мөөрейниң киржикчилери сагынгыр-тывынгырын, уран талантызын, чараш овур-хевирин, агангард болгаш кежээки каасталга хевин бараалгатканнар. 

 Жюри кежигүннериниң бадылаашкыны-биле «Москваның даңгыназы-2016» деп атты Монгуш Норгьянма чаалап алган. "Москваның тажызы-2016» атка Шойдук Начын төлептиг болган. 

 Дараазында киржикчилер: Даваа Мандыл -- "Москваның 1-ги Вице Мисси-2016"; Ооржак Даш-Буян -- " Москваның 1-ги Вице Мистер-2016"; Айызан Аюсай -- " Москваның 2-ги Вице Мисс-2016"; Санжа Селик -- " Москваның 2-ги 2-й Вице Мистер-2016" болганнар.

 Мөөрейниң шупту киржикчилери - Г.В. Плеханов аттыг РЭУ, НИТУ МИСиС, К.А. Тимирязев аттыг РГАУ-МСХА, А.И. Евдокимов аттыг МГМСУ, НИУ МЭИ, РФ-тиң Чазааның чанында Саң-хөө университеди дээш, өске-даа Москваның дээди өөредилге черлериниң студентилери. 

 Чалаттырган артистер болгаш ансамбльдар мөөрейни улам каастаан.