2016 чылда Тывада терапия эмнелгезин тудуп доозар

 Республика эмнелгезиниң терапия корпузун доозарынга федералдыг бюджеттен 2016 чылда 444 млн. ажыг рубльди тускайлаан. Россияның Чазааның даргазы Дмитрий Медведев РФ-тиң Кадык камгалал яамызынга 30 хонуктуң дургузунда Тываның Чазаа-биле субсидия бээр дугуржулганы чарарын дааскан. 

 «Кадык камгалалын сайзырадыры» күрүне программа-биле 5,2 млрд. рубль хире акша-хөреңгини үлештирген 12 регионнуң санынче Тыва база кирген. 

Кызыл хоорайда терапия корпузунуң тудуу 1996 чылда, 20 чыл бурунгаар эгелээнин сагындыраал. Акша-хөреңгиниң чедишпезинден ол ажыл ара соксаан турган. Чүгле 2013 чылда республика баштыңы Шолбан Кара-оол, РФ-тиң Чазааның бадылааны, Тываның социал-экономиктиг хөгжүлде планынче доозулбаан объектини киирерин чедип алган. 

Сөөлгү беш-алды чылда чедир туттунуп турар, совет үеден бээр туруп келген «кыраан» тудугларның сөөлгүзү - терапия корпузу болур.