Политиктиг партияларның үзел-бодалдары аңгы-даа болза, регионну сайзырадыр дээш демнежир дээрзинге Тываның Баштыңы бүзүрелдиг

 Апрель 12-де Тываның Баштыңы Шолбан Кара-оол «Чөптүг Россия» биле «РФКП» политиктиг партияларның регион салбырларының удуртукчулары - Василий Майлолович Оюн база Сергей Сээ-Сурунович Салчак-биле ужурашкан. 

 Ужуражылганың түңнелинде шупту чаңгыс үзел-бодалга келгеннер. Республика хөгжүлдезиниң талазы-биле политиктиг үзелдери болгаш көрүштери аңгы-даа болза, оларның шуптузунуң сорулгазы чаңгыс – Тываны сайзырадыр. 

 «Чазак отчедун сайгырып тура, политиктиг партияларның лидерлери - «Чөптүг Россиядан» Василий Майлолович Оюн биле РФКП-тен Сергей Сээ-Сурунович Салчак-биле ужураштым. Төрээн республикавыстың сонуургалдарын камгалаарынга сагыш салыышкын дээш өөрүп, билчилгелиг кады чугаалажылга дээш четтирдим. Маңаа, бөгүн Космонавтика хүнү бодунуң ролюн ойнаан чадавас. 

 Бо байырлал бодунуң үезинде чүгле Россияны эвес, а бүдүн делегейни каттыштырган. Бистерге ажык болгаш боттуг чугаалажылга херек деп үзел-бодалдарывыс дөмей болду. Кылыр чүүлдер болгаш сорулгаларывыс чаңгыс – Тываның чурттакчылары эки чурттазын дээш шупту чүүлдерни кылыр. Маргыжар дөстер дилээриниң орнунга, бүгү-ле күжениишкиннеривисти каттыштыргаш, ону боттандырар ниити аргаларывыс хөй дээрзинге бүзүрээр мен. 

  Ниитилелде турум байдалды хандырары – бистиң капиталывыс-тыр. Ынчангаш Тываны сайзырадырының программазын кады тургузуп, ону боттандырарынга шупту киржир ужурлуг бис» - деп, Тываның Баштыңы Шолбан Кара-оол бодунуң үзел-бодалы-биле үлешкен.