Тыва көдээ ажыл-агый кооперативтерин деткииринге Тыва 40 ажыг млн. рубльди алыр

 Тыва көдээ ажыл-агыйының хереглекчилер кооперативиниң материал-техниктиг баазазын хөгжүдеринге федералдыг бюджеттен 40 млн. 279 муң рубльди алыр. Россия Федерациязының Чазаа «Биче хемчээлдиг ажыл-агыйларын деткиири» күрүне программазының 2013-2020 чылдарда көдээ ажыл-агыйын хөгжүдер база көдээ ажыл-агый продукциязының, чиг эдиниң база аъш-чем аймааның рыногун таарыштырар иштики программа-биле субсидияларны үлээн.

 РФ-тиң Көдээ ажыл-агый яамызының федералдыг дуза бээрин бадылааны 42 регионнуң санынче Тыва база кирген.

 Статистиктиг көргүзүг-биле алырга, 2016 чылдың январь 1-де, республикада 39 көдээ ажыл-агый хереглекчилер кооперативи бар. Оларның бирээзи – хереглекчилерге, 16-зы – болбаазырадылга адырынга, 14-ү - хандырылга болгаш саарылгага, 2-зи огород база 6-зы мал ажыл-агыйларынга хамааржыр. Тываның ажылдап турар чурттакчы чонунуң 15,4 хуузу көдээ кооперацияда хаара туттунган.