Тываның Баштыңы Кызылдың мэринден дачалар микрорайонунда чырык өжүрүүшкүнүн сайгарарын негээн

 Республиканың баштыңы Шолбан Кара-оол ооң адынга хамаатылардан социал четкилер дамчыштыр кээп турары дыңнадыгларны доктаамал хыналдада алган. Ооң утказы-биле танышкаш, бодунуң оралакчыларынга, сайыттарга, муниципалдыг тургузугларның удуртукчуларынга чогуур даалгаларны берип турар. 

 Бо удаада, Москвада ажыл-агыйжы сургакчылаашкын үезинде, Кызыл хоорай чагыргазының удуртулгазынче долгааш, найысылалдың солагай база оң талакы дачалар районунда чырыктың багай хандырылгазының дугайында дыңнадыглар удаа-дараа кээп турарын дыңнаткаш, ону сайгарарын негээн. 

 «Чырыкты өжүрери эмин эртир көвүдээн-дир. Ону сайгарарын чаңгыс эвес удаа дилээн мен. Солагай биле оң талакы дачалар – силерниң думчууңар адаанда, чаа Кызыл ышкажыл. Мында элээн хөй кижилер, уруг-дарыг чурттап турар болганда, инфраструктура-биле хандырарын сүмелээн мен. Чырыкты өжүрүп турарының чылдагаанын сайгарарын негеп тур мен. Ол нарын айтырыгны шиитпирлээриниң аргазын тывыңар» - деп, Шолбан Кара-оол негелдени тургускан. 

  Регионнуң баштыңы ОБЯ-ның Тыва Республикада Кол эргелелиниң удуртулгазынга, дача ниитилелдериниң девискээринде узун хуусаада чырык чок таварылгаларже кичээнгейни угландырарын сүмелээн. 

 База ол ышкаш бодунуң бирги оралакчызы Владимир Фалалеевке часкы суг үеринге удур хемчеглерни онза контрольга алырын даандырган. 

 Тайгада-даа, чурттакчылыг черлерде-даа хар дыка хөй дүшкенинден, 2016 чылда часкы үерлээшкин байдалы нарын болур деп, республиканың баштыңы Шолбан Кара-оол бодап турар.