Тываның Баштыңы өскүстерге бажыңнар үлелгезин ажык чорударын негээн

 РФ-тиң Президентизиниң хөй-ниити хүлээп алыышкынынга Тываның Баштыңы Шолбан Кара-оол 24 харлыг Шончалай Дувендейниң, өскүс дээш Тожу кожуундан чурттаар чер-биле хандырарын дилээн, билдириишкинин көрген.

  Билдиришкининни сайгарып көргеш, Тываның Баштыңы тудуг яамызынга Тоора-Хем суурда ийи квартиралыг чуртталга бажыңының тудуг ажылдарын шынарлыг чорудуп, үезинде ажыглалга киирер даалганы берген. 

 Чурттаар чер-биле хандырттынар эргелиг өскүс болгаш ада-иезиниң хайгааралы чок арткан уругларның дугайында анализти чаартып, сөөлгү 3 чылдың сан-чурагайын көргүзерин Тыва Республиканың Өг-бүле болгаш уруглар херектериниң талазы-биле агентилелге дааскан. 

  Оон аңгыда муниципалдыг районнар, хоорай округтарының чагыргалары-биле тус черниң хөй-ниити организациязын тургузар ажылды эгелээрин база чугаалашкан.

  Чурттаар чер-биле хандырттынар эргелиг өскүс болгаш ада-иезиниң хайгааралы чок арткан уругларны каттыштырып, оочурда турар өске хамаатыларның эргелерин хажытпайн, бадылаттынган даңзы езугаар бажың үлелгезиниң оочурунга контрольду хөй-ниити организациялары чорудар ужурлуг. 

 Тыва Республиканың Өг-бүле болгаш уруглар херектериниң талазы-биле агентилелиниң оран-савазынга өскүс уругларның хөй-ниити организациязының ажылын идепкейжидерин Тываның Баштыңы демдеглээн. Тыва Республиканың Баштыңы ол даалгаларны бодунуң оралакчызы О.Д. Натсакка онааган.