Тыва Республиканың ИХЯ-зынга шынчы, шылгараңгай болгаш эрес-дидим чоруктуң сүлде демдээ болур чаа тукту дамчыдарының езулалы болган

 Сергей Матвеев онзагай болуушкун-биле хууда составка байырны чедиргеш, тыва дайынчыларның төөгүден эрес-дидим, шылгараңгай чоруу амгы үеге чедир үлегер-чижек болуп чоруурун, Тываның ИХЯ-зындан күрүне шаңналдарының 97 эдилекчилериниң 12-зи «Эрес-дидим чорук» ордени-биле шаңнаткан дээрзин онзалап демдеглевишаан, тук чүгле албан езузунуң демдээ болгаш эдилели болурундан аңгыда, ведомствонуң езу-чаңчылдарының кадагалакчызы, ажылдакчыларның профессионал болгаш мөзү-бүдүш шынарларының сүлде-демдээ болурун онзалап айыткан. 

 – Тук дайынчыларның тура-соруун бедик тудуп, дайынчы тукту олар, амы-тынын артынга салгаш, камгалап чораанының чижектерин төөгүден эвээш эвести сактып чугаалап болур. Бистиң амыр-дыш чок ажыл-херээвиске бо тук база бедик тура-соруктуң, эрес-дидим чоруктуң ыдыктыг демдээ болурунга бүзүрээр мен – деп, тукту хүлээп алгаш, Александр Лобанов чугаалаан. 

 ТР-ниң Баштыңы Шолбан Кара-оол байырлыг езулалга киржип, РФ-тиң ИХЯ-зының бистиң регионга деткимчени көргүзүп чорууру дээш четтиргенин илереткеш, чаа туктуң адаа-биле чаа-чаа чедиишкиннерлиг болурун чыылганнарга күзээн. 

 Туктуң бир талазында - ийи баштыг эзирни, өске талазында – Тываның сүлде демдээн сиилбээш, «Россияга бараан бооп тур бис», «Хоойлуга бараан бооп тур бис» деп бижээн.

 Тук тудукчуларынң байырлыг чыскаалы-биле хемчег доозулган. Аңаа яамының аппарадының хуу составы, район органнарының удуртукчулары, хоочуннар, албан хүлээлгезин эрттирип тургаш мөчээн ажылдакчыларның өг-бүлелериниң кежигүннери киришкен. 

2011 чылдан бээр милицияны полиция кылдыр эде тургускан соонда, шупту регионнарда туктарны солуп турар.