Мал кыштаглаашкыны Тываның Көдээ ажыл-агый яамызының хайгааралында

 Улуг ажыл-агыйлар саар, төрүүр малга база ооң чаш төлүнге мал чеминиң курлавырын бербишаан, өске малды амдыызында одарже оъткарып турар. Мал чеминге белеткээн 157,5 муң тонна сигенниң 122,6 муң тонназы ам-даа бар. Курлавырда 1,6 муң тонна мал чиир тараа, 0,5 муң тонна дус хевээр. Сүт-бараан бүдүрүлгелери хүнде ортумаа-биле 544 литр сүттү саап ап турар. 

 «Каа-Хем» МУБ 2015 чылдың декабрьда хүнде 193 литрни ап турган болза, ам ол көргүзүг 183 литрде бадып келген. Тываның көдээ ажыл-агый сайыдының оралакчызы Дмитрий Долгополов ол көргүзүгнүң кудулааны мал чеминиң чедишпейн турарында деп тайылбырлаан. «Каа-Хем» МУБ-та 82 тонна сиген бар, ынчалза-даа мал чиир тараа биле хоолулуг чем чок. Ажыл-агыйга чедишпээн мал чемин садып алырынга саң-хөөнү аңгылаан. 

 Таңды кожууннуң «Тывахолдинг» АҮК ААН-ның удуртулгазынга курлавыр мал чемин тургузарын айыткан. Амдыызында арткан 63 тонна сиген, 22 тонна мал чиир тараа, 3 тонна дус малдың хереглелин хандырарынга чедишпес. "Тывахолдинг" АҮК-түң төрүүр малынга немелде чемни берип, тургуза азыраар апаар. 

 Сөөлгү ийи неделя дургузунда хар дүшпээн база хадываанындан, малчын турлагларже баар оруктар эки байдалда. Бай-Тайга кожууннуң Кара-Хөл сумунуң аалдарынче чедери арай хирелиг. Ында харның кылыны 40-43 см чедип тура болгаш, малды одарладыры бергедээн. Ынчангаш малга немелде чем херек. 

Тываның Көдээ ажыл-агый яамызының специалистери Чаа чылдың дыштаныр хонуктарында хынаашкынныг үнүүшкүннерже үнүп, херек таварылгада чер-черлерге дузаны көргүскен.

 Ол-ла хонуктарда бөрүлер-биле демиселди база чоруткан. Бо хүнде бөрү аглаар 119 бригада республика двискээринде ажылдап турар.